نشطاء يدشنون حملة "التصويت الصحيح" على الدستور

"ركزوا يا جماعة.. العلامة لازم تكون داخل الدائرة، ولا تكتب أى حاجة تانى على ورقة الاستفتاء، اللى يقابلك يقولك اختار كذا أو كذا قاله ملكش دعوة، قف فى الطابور ومتزهقش ده انت بتختار دستور بلدك لأول مرة فى حياتك".. كانت هذه بعض النصائح التى انتشرت على موقع التواصل الاجتماعى مع بدء المرحلة الأولى للتصويت على الاستفتاء اليوم، السبت؛ حيث احتفى نشطاء المواقع بالتصويت على دستور مصر كتبته لأول مرة جمعية منتخبة من ممثلى الشعب.
وعبر موقع "فيس بوك" انتشرت العديد من الدعوات المطالبة بالنزول والتصويت وكذلك النصائح فى أثناء عملية التصويت والتحذيرات التى يمكن من خلالها أن يبطل الصوت، فأطلق نشطاء حملة تحت عنوان "التصويت الصحيح" شرحوا خلالها بالتفصيل عملية التصويت بداية من الوقوف فى الطابور وحتى الخروج من اللجنة.
فقال القائمون على الحملة: "من بداية نزولك من بيتك إنت مقرر هتختار إيه بالظبط متخليش كلام أى حد يأثر عليك ولا ترمى ودانك لأى حد، قف فى الطابور وادخل اللجنة سلم بطاقتك وخذ ورقة التصويت اختار اللى انت عايزه وحط العلامة داخل الدائرة وإوعى تحط أى علامات أو تكتب أى كلمة فى الورقة عشان صوتك مايضعش".
وأضافوا: "تذكر وانت بتصوت إنك بترسم مستقبل مصر ومستقبلك ومستقبل أولادك وإنه فى شهداء دفعوا دمهم ثمن وقوفقك ده، مهما كان رأيك انت بتختار لنفسك مستقبل أفضل".
وحذر على الريدى -القائم على الحملة- قائلا: "يجب ألا نستهين بنخبة العار وحشدها للناس وتزييفها للحقائق وتتويه البسطاء من الناس لازم كل واحد تكون عينه فى وسط رأسه ممنوع توجيه أى حد كل واحد بقى فاهم هو عايز إيه بالظبط".
وقال محمد العنانى: "ممنوع كمان الاحتكاك بأى حد لأن هنلاقى برده بلطجية عايزين يدمروا الاستقرار فى التصويت كلنا هنتصدى لهم بإذن المولى".
محمود سعودى: "انزلوا يا جماعة البلد محتاجة صوت كل واحد كفاية كسل وسلبية هيحصل إيه لو نزلت ووقفت شوية وقلت رأيك جه الوقت اللى نختار فيه اللى عايزينه.. انزل.. اختار.. وإن شاء الله عمرك ما هتكون خسران".
قول رأيك
ورفع البعض شعار "مش مهم" طالبوا فيه جميع أفراد الشعب بالنزول والتصويت أيا كان الاختيار.. فقال معتز وفائى: "الاستفتاء مش معركة كما يصور النخبة قول رأيك بحرية واللى هيصير يصير المهم تكون قرأت كويس دون إملاءات أو ضغوط إعلامية من الإعلام الفاسد اقرا بنفسك ومتديش فرصة لحد يلعب فى دماغك وبعدها مش مهم قلت موافق أو غير موافق".
د. عصام العريان: "الاستفتاء على مشروع الدستور، ليس على عقيدتك أو دينك، إنه استفتاء على توزيع السلطة وتوازنها وتركيبها،على مجموع المواد ال236 وهى فى أبواب محددة عن الدولة والمجتمع، والمقومات الأساسية للدولة، ونظام الحكم والسلطات الثلاث، والأجهزة الرقابية المستقلة. وأحكام عامة وانتقالية للمرور من عهد إلى عهد جديد. إنه تصويت للمستقبل. لا تتخلف وصوت بإرادة حرة، وقل نعم لمصر مدنية حديثة ديمقراطية دستورية".
رقية بشندى: "لأول مرة يكون الاستفتاء بموافق وغير موافق وليس بنعم ولا! ولأول مره تكون عدم الموافقة على اليمين والموافقة على الشمال!! (وَيَمْكُرُونَ وَيَمْكُرُ اللهُ وَاللهُ خَيْرُ الْمَاكِرِينَ)".
وعلى صفحة "يوميات تويتر مان": "لو كان بالدستور عيوب لأظهروها، بدلا من التدليس على الناس بكدبهم أنه سيتيح للرئيس بيع أراضى الدولة، أو زواج الأطفال وووو خلافه، اعلم أن سبب ذكرهم هذه المواد الكاذبة أنهم لا يجدون ما يعترضون عليه فيضطرون للكذب على الناس بمواد غير حقيقية لإقناعهم برفض الدستور، السؤال هنا إذا هم لم يجدوا مادة يعترضون عليها فلماذا هم يريدون إسقاط الدستور؟! ما المادة التى يرفضونها والناس لا ترفضها فيضطرون للكذب على الناس ليرفضوا الدستور بأكمله؟".