صور.. ناجيان من وايت نايتس: مجزرة الدفاع الجوي مدبرة.. ولن نترك حق الشهداء

قال عبد الرحمن كمال - أحد الناجين من مجزرة الدفاع الجوي اليوم قبيل مباراة الزمالك وإنبي في الدوري -: "الحمد لله الذي نجاني من الموت أولاً، اللي حصل ان مكنش في غير ممر واحد لدخول الاستاد الممر ده عرضه بالظبط لا يتعدى ال4 متر بس كان طويل كان في حوالي 8 ألاف واحد بأقل تقدير كنا واقفين مستنين الأمن يدخلنا، ومرة واحدة ضربوا غاز علينا حصل تدافع رهيب من ريحة الغاز وانه بيحرق الوشّ ناس وقعت ع الأرض وأتداس عليهم وانا كنت من ضمنهم بس كان في ناس تحتي".
وأضاف :"واحد مات تحت مني وأنا كنت بتشاهد بس ربنا نجاني وأنا كان بيني وبين الموت اقل من ثواني". وتابع :"عدد اللي ماتوا أكثر من 20 واحد ودول شفتهم بعيني، وقسماً بالله لن نترك حق الشهداء".
وقال ياسر معجزة: "المذبحة كانت متدبرة! - دخلونا الممر أكتر من 5 ألاف واحد، بعدين قفلوا المتاريس من بره و ضربوا غاز علينا والناس ماتت من الغاز ومن التدافع و قفلوا الطريق بتاع الخروج والداخلية فضلت بتجري ورانا وبتضرب غاز وخرطوش حوالين الاستاد في الصحراء".
وأضاف :" العساكر الغلبانه كان بيلموا المحافظ والفلوس ويفتشوا الجثث والناس اللي فقدت وعيها"، وتابع :" عربيات الإسعاف جت بعد ساعة من المذبحة ".