السيسي في إفطار الأسرة المصرية: "السنتين اللي فاتو علموا في جسمنا"

السيسي: ماحدش حايفرض إرادته علينا.. ربنا نفسه خير الناس في عبادته

كرر الرئيس عبد الفتاح السيسي، خلال إفطار الأسرة المصرية الذي أقيم في فندق الماسة بمدينة نصر، إشارته لما يحدث في المنطقة، من غياب الاستقرار والأمن في بعض الدول العربية.
وقال السيسي "إحنا لازم يا مصريين نكون على قلب رجل واحد، وبكرر إن كل المصريين مسؤولين، ومعنى كده أن ال90 مليون يفضلوا عايشين وما حدش يأذيهم أو يضرهم".
وأضاف "كنا نتمنى إننا كمصريين منختلفش، وبقول الكلام ده لأن وارد نختلف، بس منختلفش خلاف يضيع البلد، المهم اللي يختلف معانا كلنا نسمعه، وأي حد عايز يعيش في سلام وسطنا أهلا وسهلا، أكيد هيعيش وسطنا، وأي حد عايز غير كده إن شاء الله مش هيقدر".
وتابع السيسي "إوعى تتصور أو تفتكر إننا ممكن نزهق ولو بعد 10 سنين" في إشارة إلى الإخوان، "ومحدش يقدر يقهر إرادة المصريين بالقوة أو الترويع، هو مش واخد باله إننا مش هنكون أقوى من القرار اللي خدناه في 30 يونيو من سنتين".
وأوضح الرئيس قائلا "إحنا محتاجين دايما نفتكر، أنا مش بقلب المواجع، بس السنتين اللي فاتوا علموا في جسمنا، وافتكروا 3 يوليو و8 يوليو و26 يوليو و14 أغسطس ولغاية دلوقت، وبقولكم عايزين تعيشوا معانا في أمان أهلا وسهلا، والأرض تسعنا كلنا وتكفينا وزيادة، لكن تفرض إرادتك علينا مش هينفع، ده رب الخلق خير الناس في عبادته".