د. هانى أبوالفتوح يكتب: يا سنة جديدة ممكن كلمة (2-2)

نرجع تانى ونلبس طرحة
ولا نقول آسفين يا أخينا
نمسك توبنا سوا بإيدنا
يرجع شط الوادى لسينا
مطروح تجرى تنادى عريشنا
رد الأقصر قال أهو جينا
بالأحضان يا بلادى تاخدنا
فى الإسماعيلية قنال وسفينة
فى بحرى يقولوا فى مدح حبيبنا
فى صْعِيدْ صوتها يِرَدد مينا
اللى يقول حلمنا فَرَّقْنَا
ييجى يشوفنا تاريخنا حامينا
عيسى ومحمد صلوا عليهم
ومريم قاعدة جنب أمينة
بيقسموا لقمة وف إيد بعض
خطوة بخطوة على أعادينا
وف أحزانا بنشكى لبعض
نلاقى لَمِّتْنَا جت تداوينا
كل كلامنا بطعم فرحنا
كفاية علينا ليالى حزينة
كل تراب الحلم يِكَبَّر
اللهُ أَكْبَرْ
ترجع تانى تِجَمَّعْ فينا
ننسى الفُرقة ونار الْحُرقَة
ننسى خلافنا ونرسم لوحة
لجامع واقف جنب كنيسة
ينادوا يا مصر تعالى خُدينا
عمرنا يوم ما عرفنا البُعْدْ
وعمرنا يوم ما لغيرنا شكينا
ولا عايزين حد يفرقنا
ولا هنسيب للفتنة مدينة
مصر بلدنا هترجع تانى
خطوة بخطوة هترجع لينا
يا سنة جديدة ممكن كلمة
بالراحة علينا شوية شوية
إحنا يادوب سنة أولى حرية
إحنا يادوب نبتدى خطاوينا