أكرم حسني: لم أتعد على "بلاد طيبة".. و"الكينج" اتصل بي وهنأني

نفى الإعلامي أكرم حسني، تعديه على حقوق الملكية الفكرية لأغنية "بلاد طيبة"، التي غناها الفنان محمد منير.
وكتب أكرم، على صفحته الشخصية عبر موقع التواصل الاجتماعي "فيس بوك"، "على الرغم من إن في ألف حاجة أهم من الموضوع اللي هاتكلم فيه، لأن ظروف البلد مش ناقصة، ولكن من حقي أرد على ادعاءات، بدأت تنتشر اليومين اللي فاتوا عن إني تعديت على حقوق الملكية الفكرية، للأستاذ المحترم مدحت الخولي،‬ مؤلف وملحن أغنية (بلاد طيبة)، للكينج محمد منير، والفنانة الكبيرة أنوشكا، وإني استخدمت لحنها في برنامج (أسعد الله مساءكم من جديد)،‬ بدون ما أخد تصريح بده".
وأضاف أكرم، "أولًا: أنا عمري ما تعديت على حق أو مجهود أي فنان أو مبدع، لأني عارف كويس أوي يعني إيه حد يتعب ويلاقي حد جه أخد مجهوده على الجاهز ونسبه لنفسه، وبالتالي قبل ما أستخدم لحن الأغنية تقدمت بطلب لجمعية المؤلفين والملحنين بتاريخ 8 أكتوبر الجاري لاستخدام اللحن، وتم التصريح ليا باستخدامه".
وتابع حسني، "ثانيًا، بعدما عرفت إن الاستاذ مدحت عاوز ياخد إجراء قانوني، حاولت الاتصال بيه عشان أوضح له الموقف، بس هو للأسف مردش عليا، فبعت له رسالة وقلتله أنا أكرم حسني وبحاول أكلمك، ولكنه للأسف بردو مردش عليا".
واستطرد، "ثالثًا، الإجراء اللي أنا بعمله دا مش وليد النهاردة، لأني بقدم برامجي في التليفزيون من أكتر من 5 سنين، وهتلاقوا صورة مع البوست ده، بتوضح إني بعمل دا من سنة 2010 لحفظ حقوق المبدعين أصحاب الحقوق".
وأكمل حسني، "رابعًا، وده أهم ما يعنيني في الموضوع، بعد اتخاذي كافة الإجراءات الرسمية، هو اتصال الكينج الفنان الحقيقي اسمًا وحجمًا محمد منير‬ بيا، فوجئت بيه بيكلمني في التليفون، وبيقوللي يا أكرم أنا باحييك على الأغنية، وأنا اتبسطت بيها جدًا، وضحكت من قلبي وأنا بتفرج عليها، واوعي تلتفت لأي حد عايز يحبطك، وخليك مركز في شغلك وبس، ودا إن دل على حاجة، فهو بيدل على احترام هذا الفنان، وإن حجمه الفني وتاريخه دول مجوش من فراغ، تحية من كل قلبي للكينج لتواضعه وحبه للناس".