عايز مشروع قومي

من بعد ثورة 25 يناير واحنا علي طول بنسمع كلام من عينة "إحنا محتاجين مشروع قومي، لازم مشروع قومي يتلم حوله الشباب".
وطبعا الكلام ده جزء منه كان أصحابه بيطلقوه بنية صافية وعلشان مصلحة البلد، وجزء تاني كان بيقول الكلام ده علشان أغراض تانية.
جماعة الإخوان الإرهابية نفسها قالت الكلام ده على مشروع تطوير محور قناة السويس اللي مرسي كان عايز يعمله ويبيعه لقطر..
طب أهو السيسي اللي قعدتوا تقولوا معندوش برنامج انتخابي طلع عنده برنامج، وطلع عنده مشروع قومي.
والحقيقة أنا مش فاهمة اللي بيهاجم المشروع ده ويوصفه بالهلاوس والأحلام بيعمل ده بناء على إيه ؟؟.
وبعدين يا سيدي كل الأعمال العظيمة كانت أحلام في الأول.. ماهو حضرتك لو مكانش عندك حلم يبقي معندكش هدف أصلا.. الأحلام مش عيب.. هتقول لي هتتحقق إزاي؟؟.. هقولك مفيش حاجة اسمها مستحيل.
بصوا فيه فرق بين إنك يبقي عندك حلم صعب وتتعب وتشتغل علشان تحققه.. وبين إنك بمنتهى السلبية تقول لا لا الحلم ده صعب سيبنا منه.. لازم تحاول وما تستسلمش مهما كان الحلم صعب أو بعيد.
الإخوة بقي الجماعة الإرهابية ومحبيها ومتعاطفيها بتوع "السيسي سرق مشروع مرسي".. ده على اعتبار إن مرسي ده كان عنده مشروع أصلا.. وبغض النظر عن إن المشروع ده قديم من قبل الإخوان ما ربنا يبتلينا بيهم في الحكم، وبغض النظر عن الاختلافات الجوهرية بين المشروع اللي أعلن عنه السيسي والمشروع اللي مرسي كان عايز يعمله، لازم تفهموا الفرق الفظيع بين المشروعين.. مشروع مرسي كان بيهدف إنه يبيع قناة السويس ويخلي قطر وغيرها يتحكموا فينا.. مشروع السيسي، مشروع بتاع المصريين، هنموله إحنا ونعمله إحنا بإدينا.. مشروع مصري 100%، محدش هيبقي ليه فضل علينا ولا هيشترينا ولا يبيع ويتحكم فينا.
وزي ما الريس قال أي حاجة تفيد البلد مش هنتكسف نعملها ونقول لأ علشان ما يتقالش سرقنا وقلدنا.. الكلام ده تقولوه في حوش مدرسة مش في بلد بتتبني.
إنتوا طلبتوا مشروع قومي، أهو مشروع قومي مصري تماما.. بدل بقى نغمة الإحباط والكلام الفاضي.. اشتغلوا.
عارفين المشروع ده هيفتح كام بيت.. فيه عمال قاعدة مبتشتغلش بقالها 3 سنين وأكتر.. بلاش دول، افتكروا العمال اللي رجعوا من ليبيا والعراق وسوريا.. "الناس هتشتغل إيه؟؟".
المشروع ده باب رزق لبيوت كتير مش بس العمال اللي ضمنوا شغل على مدار 3 سنين.. لا.. كل المجالات.. فكرتوا بعد ما يخلص المنطقة دي هتبقي عاملة إزاي؟؟.. مش علي المستوى المحلي بس.. لا عالميا كمان.. طب فكرتوا أو تعرفوا إننا ضربنا مخطط إسرائيلي كان بيهدف لإيجاد بديل لقناة السويس؟.. المشروع ده هيغير المنطقة كلها وهيغير حياة ناس كتير واللي يقف قصاده أو يحاول يهده، هو إما عميل أو غبي.
كنت عايز مشروع قومي؟.. اتفضل ياسيدي ده مشروع قومي، ورونا همتكم يا مصريين، وتحيا مصر.