شوقى يكشف تفاصيل ال«3 امتحانات التجريبية»: هدفنا تجربة الأمور الفنية

أكد الدكتور طارق شوقي، وزير التربية والتعليم والتعليم الفني، أن الهدف من عقد الامتحانات التجريبية تجربة كل الأمور الفنية الخاصة بالشبكات، موضحا «لم تكن تجربة أكاديمية»، لافتًا إلى إعلان ذلك منذ 23 مارس: «كله مشي زي ما خططنا وجت لنا كمية عن المعلومات عن الأمور الفنية سواء عن الخوادم في 2300 مدرسة أو الشبكات الفيبر أو الشرائح اللي مع الأولاد».
وأضاف الوزير خلال مداخلة هاتفية مع سيد علي في برنامج «حضرة المواطن» المذاع عبر فضائية «الحدث اليوم»: «أن كل الحكاية اننا بنقيس سعة الشبكات المختلفة سواء السيرفرات أو الفيبر اللي طالع من كل مدرسة من آلاف المدارس وال700 ألف شريحة»
وعن سبب إجراء الامتحانات التجريبة، أكد شوقي «السبب كنا عاوزين الأولاد يتأقلموا على الحصول على اليوزر نيم والباسورد ورقم الجلوس ويحدثوا التابلت وكتير من ده حصل النهاردة»، مضيفًا «فيه ناس شايفة اننا روحنا وملقناش أسئلة مع أن احنا قايلين الكلام ده وفيه اللي قال احنا روحنا ومعرفناش نخش واحنا قاصدين الحكاية دي واحنا حاولنا نشرح ونطمنهم ونقول لهم احنا بنعمل كل ده».
وأكد شوقي أن هذا الامتحان التجريبي ليس الأول ولكن هناك امتحانين آخرين: «وده واحد من 3 امتحانات تجريبية وده أول واحد وفيه واحد في آخر مايو وهيبقى فيه أسئلة من المنهج وبرضه هنختبر الشبكات بعد التعديلات اللي هنعملها على أثر هذا الامتحان»، مضيفا: «فيه محاكاة كاملة في يونيو وكل ده عشان نريح».
وكشف شوقي تفاصيل الاختبار التجريبي يوم الثلاثاء: «يوم التلات هنقفل الخوادم الشرايح وهنستخدم بس الفايبر اللي في المدرسة»، موجهًا رسالة للطلاب: «اللي معندوش فايبر في مدرسة ومعندوش سيرفر ميروحش يوم التلات والباقي كله يروح لأننا عاوزين نعرف مدى سعة الفايبر كافية ولا لا وده يشرح احنا بنحاول نعمل ايه».
وتابع: «احنا هنختبر الواي فاي بتاع المدرسة نفسها انما فيه أولاد في مدارس خاصة معندهمش الحاجات دي مش محتاجين يروحوا يوم التلات ومحتاجين يروحوا يوم الخميس لأننا هنحتاج نختبر شريحة الوزارة مش أي شريحة تانية هما شارينها ومش هتشتغل إلا في المدرسة».
وأوضح شوقي أن يوم الخميس سيشهد الاختبار التجريبي تجربة للشرائح: «يوم الخميس هنشوف الشرايح فقط يعني هنقفل السيرفر وهنقفل الفيبر».