رقصة المماليك

الوش شقق
م التوهة في الزحمة
خد م الشوراع والحارات
كل تفصيلة وحفرها
شوف بلادك ع الوشوش
تلقى التاريخ منقوش
على كل تجعيدة
تاريخ مكتوب
بكل أة آلم
وكل صرخة ندم
وكل تنهيدة
أدي الوشوش العظيمة
منقوشة بالأزميل
فاضحة اللي بين السطور
ف كل كتب القصور
وكل ملمح
له علامة ودليل
اقرا وشوف العجب
ليه بيحكمها الحرامي
والكاهن المملوك
وشيوخ في معبد أمون
أو حتى هيليوبلس
بالفتوى غشوها
وقالوا نخرمها
يا إما تغرق بناسها ياإما نحكمها
اقرى وشوف كام ألف يونس بيغرق
ف البر أو ف البحر
ويخفف الأحمال
ويكشف الأندال
ولازال بنا لازال
الحكم للأندال
والشعب مهما ثار
ع الحاكم الغدار
ويعدل اللي مال
يتوه من تاني أو يغرق
ويصبح كل شيء لزوال
تعود ريما لعادتها
لضيق الإيد وماسكتها
على الرقبة
وخانقة مابعدها خانقة
ندور ونلف نتسوق وشوش
الناس
بضاعة كلها مكسب
يا مين يكسب
هنا مجرى لدمعة حزن
هنا بسمة أمل حاير
ملامح بنت بتشابي على الفرحة
ونظرة خوف على لقمة
ومن لطمة
هنا تجاعيد ووش سعيد
هنا الكورنيش
وقصة حب كدابة
وشوش خرفان على ديابة
وشوش نايلون على كرستال
وشوش من خيش
وشوش ممسوحة للبهوات
وشوش تانية لبهلونات
وشوش تركب على الثورات
وشوش تخنانة م الثروات
وشوش عدمانة م الحوجة
تجر الموجة في الموجة
ما توصل شط
ومهما هترسم السكة
طريق واضح
ومهما هتفضح المفضوح و الفاضح
يتوه الخط تلو الخط
تضيع الناس و حقوقها
لكن ما يضيع جاه الأمرا والسلاطين
ندور ونلف نتسوق
وشوش الناس
بضاعة كلها حاسرة
ما يشتريهاش غير المجانين
أو شاعر في قلبه الثورة متحاصرة