كوميديا الامتحانات: «ياللى بتسأل عن المواد.. شيلها كده زى ما هى»

كوميديا الامتحانات تسيطر على مواقع التواصل الاجتماعى، ودفعت المترددين عليها لتدوين تعليقات ساخرة تعبر عن شعورهم فى تلك الفترة العصيبة.. «بُشرة خير النسخة التعليمية»، هى أحدث ما تداوله النشطاء للأغنية صاحبة الشهرة الواسعة، للتعبير عن القلق الذى يساور طلاب المرحلة الثانوية والجامعية من صعوبة الامتحانات وشبح الرسوب، محاولة وصف حال الطالب «البليد» وهو على أعتاب فترة الامتحانات.
«دى مادة سودة من أولها وكل الدفعة هتشيلها.. وخُد بقى عهد تذاكرها سقطت كتير.. خَدِت إيه وقت من يومك.. ما تستخسرش بفلوسك.. هتاخد بكرة مجموعة.. دى بُشرة خير»، هو مطلع الأغنية، حيث احتفى بها المترددون على صفحة «شباب وبنات كلية حقوق القاهرة»، وعلق «على ويكا»: «جامدة بس التفاؤل مطلوب دى لسّه أول سنة»، بينما اكتفى «أحمد توينز» بجملة: «ربنا يقدرك على فعل الخير».
المقطع الأشهر فى الأغنية بالنسخة التعليمية كان: «قوم نادى على اللى شايل واللى عايد واللى فاشل.. واللى عايد فى امتحانه اللمّة دى لمة رجال.. وأنا هاجى مع التجارى والصناعى والزراعى.. والإعلامى الميّة مية وآداب وآثار.. ما توصيش الصيادلة الدنيا بايظة كده كده.. وكمان التربوية ياما شالوا قد كده.. كلمنى ع الدكاترة.. وإحنا ويا بعض أقوى.. وإحنا ويا بعض أقوى.. وسقوطنا أكيد»، حيث علقت «منى منى» عليه قائلة: «الله على الإبداع».
«أيوه أنا من الجيل اللى سنة أولى ثانوى إنفلونزا الطيور، سنة تانية ثانوى إنفلونزا الخنازير، سنه تالتة ثانوى ثورة يناير، أولى جامعة ثورة 30 يونيو، تانية جامعة غاز وموت فى الجامعة اللى طول عمرها مستقرة.. ده نحس ولّا غباء من الآخرين مين إلى زيى»، هو أحد التعليقات الساخرة التى كتبها الطالب «معتز» على الصفحة.