"محمد" في الكويت يرسم سلالم موسيقية على أنغام "تحيا مصر"

شاركت في الانتخابات الرئاسية واخترت المشير من أجل عودة الاستقرار لأسرتي

على أنغام العود، قرر محمد مختار، مدرس مادة موسيقى، مقيم في الكويت منذ 6 سنوات، أن يشارك في الانتخابات الرئاسية بشعار المرشح الرئاسي المشير عبدالفتاح السيسي، الذي وجل قلبه منذ أن سمعه "تحيا مصر"، فكر أن يؤيده بشكل مختلف من نوعه، ويقول "رسمت السلالم الموسيقية على السبورة عشان أعزف عليها في الفصل، لدرجة إن الأطفال حبوا الفكرة وبدأوا يحفظوا النشيد الوطني بتاع مصر من كتر حبهم فينا، ماهي بلدي أم الدنيا".
لم يشعر الرجل الأربعيني بالخوف، حين رسم على سبورة الفصل "تحيا مصر"، على الرغم من وعيه الكامل بعدم تدخل الأطفال في المجال السياسي، "أنا موجهتش الأطفال لحاجة معينة، كل اللي عملته إني عبرت بمهنتي وبشكل مختلف في وقت الفسحة بحبي لمصر اللي نفسي أرجعها، ولما الأطفال رجعوا قررت أمسحها، وهما اللي أصروا أنهم يصوروني معاها، وأحفظهم نشيد مصر عشان بيحبوه"، مضيفًا "السلالم الموسيقية أنا رسمتها للسيسي بأنغام عملتها بالعود عشان أثبت للعالم إن الراجل ده يستحق كتير، ومن كتر الناس اللي هنا بتحبه نزلوا معانا وقت الانتخابات وكانوا واقفين بصوره وبيشجعونا".
يرى محمد أن المشير السيسي منذ إطلالته الأولى، في بيان 30 يونيو، أنه رئيسًا لمصر ولم يعد غيره قادر على عودة الاستقرار التي فقدته أسرته، "الدنيا اتخربت من بعد الإخوان، وولادي لما بيكلموني بيبقى هاين عليا أقولهم مينزلوش من البيت بعد اللي بشوفه في التلفزيون"، مضيفًا "بس الانتخابات قربت خلاص ولازم الكل يشارك، عيالي هينزلوا وهيحددوا مستقبلهم بأديهم زي ما سبقتهم ورسمت حلمهم اللي جاي واخترت السيسي، اللي مفيش غيره يقدر يصلح البلد ويرجعلنا الأمان والحب بين الناس من تاني".