م الآخر| مطلوب أنسة حسنة المظهر

"مطلوب أنسة حسنة المظهر للعمل" خد من دة كتير يا معلم، أنا المفروض إني بقيت راجل اتحمل مسئولية نفسي - ده المفروض- طيب كلام جميل لحد هنا السؤال بقى.. ازاي أتحمل المسئولية؟.
أجاوب انا على السؤال ده من وجهة نظري إن الواحد لازم يستقل ماديًا لعدة أسباب، وأهمها:
1- إنه يعرف قيمة القرش اللي بيكسبه.
2- يتفاعل مع الناس أكتر، ويكتسب خبرات أكتر (بحكم انه بيشتغل).
3- يجهز نفسة لمرحلة الاعتماد الكلي على النفس، بعد الجامعة سواء كان هيتجوز أو على الأقل يصرف على نفسه.
4- الأهم من دة كلة ترحم أهلك بالذات لو عندك اخوات مش معقول برضه واحد طويل عريض ياخد مصروف زي واحد في ابتدائي.
5 المحطات المهمة في حياتك: تتولد – تدخل المدرسة – تجيب مجموع في الثانوية – تدخل كلية كويسة – تتخرج – تشتغل – تتجوز
مفيش شغل يبقى مش هتتجوز، أصل الجواز والشغل في بلدنا مرتبطين ببعض.
طيب أنا شاب زي كل الشباب بحاول اعتمد على نفسي، وباخد بالأسباب على قد ما أقدر، وبسأل، وبلف، وادور على شغل مناسب ليا كخريج جامعي معاه شهادة محترمة.. المطلوب مني عشان اشتغل لازم يكون عندي خبرة، وعشان يكون عندي خبرة لازم اشتغل.
احنا مش بنلف في دوائر.. احنا بنلف في متاهة ملهاش أول من آخر، لأ وياسلام بقى لو واحد حن عليك وقالك هشغلك.. يطلب منك طلبات مستحيلة:
اللي يقوللك 12 ساعة.. فاكر نفسة جايب عبد حبشي، وهو سيد من أسياد قريش، لأ والشغل في الآخر ب 600 جنيه، واللي عايزني ابقى دليفري في مطعم، وتنقلاتي لتوصيل الطلبات على حسابي، واللي شوية شوية هيقولي انت هتكسر حجارة في الجبل.
المهم اني بدور و ادور ومش لاقي حاجة مناسبة ليا، مش لاقي أي شيء ممكن يضيف لخبراتي أو على الأقل لجيبي، أعرف "ديلر" في المنطقة قاللي تعالى معايا اشتغل، وهتكسب أكتر من اللي بيكسبة ابوك نفسه، ولو شغلت دماغك معايا في سنة هتكون مليونير، وفعلًا فية ناس بتعمل كدة، مؤهل عالي وبيبيع مخدرات بس عشان يكفي نفسة، ويعيش لو لفيت في وسط البلد هتلاقي كل المحلات تقريبًا كاتبة "مطلوب أنسة حسنة المظهر".
طب بالنسبة للولاد؟ مفيش؟ خريج جامعي زيي مش لاقي حتى شغل في محل ملابس! طب انتوا لية مش بتشغلوا ولاد؟ سألت السؤال دة لصاحب محل، قاللي عشان البنت بتجيب الزبائن للمحل، ولو كانت حلوة الزبائن بتكتر، وحركة البيع والشراء بتبقى أكبر! حقنًا للدماء سبتة ومشيت، وجه في بالي اني أضربة بحاجة على راسة "قُلة" مثلًا زي سمير غانم في "المتزوجون".
الراجل بررلي إن البنت في المحل مش بني آدمة، لأ مجرد سلعة يعني تدخل تشتري تتفرج على البضاعة المعروضة، وفي نفس الوقت على البنات اللي شغالة في المحل.. طب ما انت لو مش عارض حاجة كويسة لو جبت "مارلين مونرو" نفسها مش هتعرف تبيع حاجة، و يا عيني بقى لو فية زبون رخم ممكن يتحرش بيها، أو يقولها كلمة ملهاش لازمة، واضح إن الكل مظلوم سواء اللي مش لاقي شغل أو اللي بيشتغل، أتمنى الأوضاع تبقى أحسن، وميبقاش عشم إبليس في الجنة.