بالصور| "شباب المعادي" تحتفل بالأطفال الأيتام طوال العام: "ضحكتهم وفرحتهم هدفنا"

"أحمد": قررنا نجمّعهم يومين في الأسبوع عشان اليتيم مش مجرد يوم في السنة

كراسة رسم، وألوان، وبالونات في الهواء، وعرائس متحركة.. أشياء بسيطة اعتادت رابطة "شباب المعادي" أن تفرّح بها 100 طفل من الأيتام وأبناء الأسر الفقيرة طوال العام، "إحنا شباب في الخير، ملناش أي علاقة بالسياسة ولا تبع أحزاب ولا تيارات، هدفنا إننا نحث الناس على أن اليتيم مش مجرد يوم في السنة"، قالها أحمد ياسر أحد شباب الرابطة.
ما بين ابتسامات الأطفال، وفرحتهم التي تكاد تقفز من الوجوه، وقف الشاب العشريني مرتدياً ملابس "بطوط"، "ابتسامة الأطفال وضحكهم اللي من القلب هو هدفنا، عشان عارفين قد أيه هما مظلومين في الدنيا عشان ملقيوش حد يهتم بيهم غير يومهم اللي في السنة، ولأنهم ماختاروش سكتهم ولا مستقبلهم، عشان كده قررنا من 3 سنين نجمع نفسنا ونحتفل بيهم يومين أسبوعيا مع أبناء من الأسر اللي محتاجة وغلابة في المنطقة".
وأضاف "أحمد": "مركز شباب صقر قريش هو اللي بيساعدنا نستضيف الأطفال عندهم، وبيخلونا نلاعبهم بألعاب المركز، وإحنا اللي بنوفرلهم وجبات من الطعام، وكراسات الرسم والألوان عشان نخليهم يعرفوا يرسموا وننمي موهبتهم واللي مبيعرفش يرسم بنعلمه حاجة جديدة تسعده في حياته، زي القراءة والكتابة وقواعد احترام الكبير، وكمان بنوفر لهم ملاعب للعب الكورة"، مشيراً "من أهم أهدافنا إننا نبني بلدنا بالتطوع، ونساعد الأطفال اللي محتاجة تتعلم ونعلمهم في بيئة سوية عشان يبقوا زي غيرهم وميحسوش بالفرق، ونخلي الحلم حقيقة ويطلع منهم أهم شخصيات في المجتمع بتطوعنا".