بالصور| لو جنان إنك تنزل الشارع وتلعب مع الأطفال.. اتجنن

بالونات في الهواء، عرائس من ورق الكارتون، رسم على الوجوه، أشياء بسيطة اعتادت بها مجموعة من الشباب أن يجوبوا الشوارع لبث روح السعادة في الأطفال، في هذه المرة قرروا أن ينزلوا منطقة شبين الكوم بالقناطر، "جمعنا بعض وقولنا ننزل من غير أي مناسبة، الأطفال محتاجين اللي يوعيهم ويفرحهم، والفن مش سلعة"، قالها حسين شريف، أحد مؤسسي الفكرة.
وسط حالة من الفرحة تكاد تقفز من الوجوه، وسعادة غامرة، وابتسامات حقيقية، وقف الشاب العشريني وفريقه بين الأطفال، "بدأنا نجمعهم وكل ما طفل يعدي ويشوفنا بنرسم ونلون ينضم لينا، هدفنا مش بس أطفال الشوارع، أي طفل بنشوفه بنخليه يلعب ويتبسط ونعلمه الصح بدل ما ييجي حد يستغله في حاجة غلط"، مضيفًا: "لا ننتمي لأي تيارات أو أحزاب سياسية، إحنا شباب بنحب أطفال مصر وشايفين إن الأمل فيهم، لو كل واحد فكّر يسعد طفل ويعلّمه الصح مفيش طفل هيقلد الغلط اللي بيشوفوا في أفلام اليومين دول، عشان هيلاقي الناس حواليه وبيحبوه مش كرهينه".
يسعى "حسين" وفريقه لتقديم ما هو جديد في الشارع بين الأطفال: "بنحاول ننزل أماكن كل فترة عارفين إن أطفالها محتاجة اللي يهتم بيهم ويلعب معاهم، وبننزل ليهم بأبسط الإمكانيات اللي ممكن تفرحهم، يعني المرة دي حاولنا نعملهم شكل إسبونش بوب بورق الكارتون عشان يلبسوه ويتصوروا بيه".
وأضاف "حسين": "بنجمّع فلوس كل يوم ولو حتى ربع جنيه وأول ما بنلم مبلغ بنقرر نشتري حاجات بسيطة وننزل للأطفال في الشوارع عشان نسعدهم"، متمنيًا: "نفسنا الناس كلها يبقى في قلوبها رحمة وحب الغير، ومحدش يشوف طفل غلبان ويسيبه حزين، وأي حد يشوف طفل عايش في الشارع بيعمل حاجة غلط يعلمه الصح بدل ما نخاف منه ونقرف".