م الآخر| اضحك مع مرشحي الرئاسة المغمورين

في يوم كده قاعد زهقان وعاوز اضحك فكرت اشوف فيلم كوميدي.. بس تقريبًا حافظ كل الأفلام!.
طيب اعمل ايه؟ سألت واحد صاحبي دمه خفيف على مشكلتي، قال لي هنصحك نصيحة لوجه الله، عاوز تضحك صح.. سيبك من كل الأفلام واتجه لفيديوهات مرشحين الرئاسة!.
استغربت جدًا من كلامه، قولتله ياعم بقولك عاوز اضحك مش هاشوف هانتخب مين، قاللي يابني أحلى كوميديا تطلعها من الناس دي، فتحت فعلًا الإنترنت، وقلبت على فيديوهات مرشحين الرئاسة.. فعلًا الكوميديا كلها هناك اللي يقولك أنا حلمت ب(سيدنا محمد عليه الصلاة والسلام)، واللي يقولك انا لو نجحت هتنازل عن الرئاسه للسيسي، واللي يبوس في حمدين ويقول انا هرشح السيسي، وهو أصلًا مترشح!.
بس من بين كل دول لاقيت واحدة اسمها منال سالم، قولت بس هي دي اللي هتضحكني أكتر من أي حد، وأول ماشغلت الفيديو بصراحة لقيت حد فاهم بيناقش مشاكل المجتمع، وعنده حلول ليها، لقيتها مش فارق معاها تكسب أو تخسر.. بس مهتمة جدًا صوتها يوصل للمسؤولين.
شدتني أوي إن اعرف عنها أكتر.. قعدت اقلب على النت عشان اشوف، لاقيتها تقريبًا مظهرتش في حاجات كتير، بس اللي عرفته عنها إنها كانت عايشة في الخارج، وبتقبض كويس، وسابت كل ده عشان مصر، وعرفت انها جمعت حوالي 12 ألف توكيل.
نسيت الضحك وكل حاجة، وحسيت بجد أن هذه السيدة إن لم يكن لها نصيب في الترشح، فلابد وأن يتم ترشيحها لوزارة ما أو مسؤولة في الدولة، ولابد أن ننصت لها جيدًا.