ميصعبش عليك غالى

بتصعب عليا عيونى اللى راحت
ودمى اللى سال
ويصعب عليا انه لسه ف كلامهم
شوية عيال ....
وانا لسه حاسس بطعم الخيانه
وطعم المزلة ف ناس عايشه خاضعه
وراضعه المهانه
بيصعب عليا اللى دايما يضحى
وفرحة شبابك ف يوم التنحى
وتصعب عليا بلدنا الجميلة
وانا لسه برضو ماليش فيها حيله
وعسكر بيضرب
وظابط بيهرب
وقال لما تخرب هيرجع مكانه
بيصعب عليا انى اسيبها وسافر
وميت الف حافر بينهش ف جسمى
من الفقر ناحيه
وم الشغل ناحية
وم الجهل ناحية
وم الجوع نواحى
وانا اللى بكفاحى على اليأس كافر
.............................
بتصعب عليا جراحى اللى زادت
وشمسى اللى غامت
وضهرى اللى محنى
وقمرى اللى باهت
وتصعب عليا فاتورة حسابى
وبدفع تمنها سنين من شبابى
بعجز بسرعة
واموت جوا قرعه
..............................
بتصعب عليا شيوخ السياسه
وكرسى الرياسه
ودولة عتوله
بتتباع مأوله ف سوق النخاسه
وقعدة بتجمع
خبير دبلوماسى
مرشح رئاسى
محلل سياسى
ومطلعش الا بصداع جوا راسى
ووسط الليالى
يقولى المزيع
الفظيع المُغالى
ف زحمة بلدنا
ودوشة حياتنا
ميصعبش يابنى .....
عليك أى غالى ..