يااااه.. بقالي كام مقالة كده "متنشن" وشغال احكي في السياسة والجو اللي بيخلي الواحد شايف الدنيا سوده قدامه وغم في غم بجا، ونسيت ان في مجتمعنا حاجات تستاهل اننا نتكلم عنها وننناقشها "ونقلش عليها" وناخد منها الحكمه اللي بتقول "شر البليه ما يضحك"، وأنا أقصد البليه بفتح "الباء" مش بكسرها، مش طالبه "ألش" من أي حد علينا. المهم.. انتم مش ملاحظين إنه انتشر اليومين دول لبس شبابي بناتي، أقصد ولاد بناتي، يووه يعم أقصد لبس البنات اللي الولاد بيلبسوه اليومين الدول!.. حاجه غريبه أوي بصراحه بعد ما شوفت الشباب دول لابسين اللبس ده لاقيته لايق عليهم.. آه والنعمة.. يعني تحس كده إنه اختك يا أخي، وهو بيتصور كده تحسه انه شبه واحده تعرفها او نفس البصه اللي بتكون في عيون اي بنوته مكسوفه.. أو نظرة البنوته "المدلعه الكيوت"، لا حول ولا قوة إلا بالله ما تسترجل يبني.. "عوّض علينا عوض الصابرين يا رب". على كده ممكن سنتين تاني لقدام هنلاقي مشكلة التحرش بقت فيكم انتم مش في البنات ؟! ومش بعيد البنات هي اللي تتحرش بيكم بس هي مش هيكون قصدها تتحرش بيكم هي هتاخد بمبدأ "احنا بنات زي باعدتشيناه" وبدل ما هنكون بنحاول نلاقي حل لمشكلة التحرش بالبنات، هندور على حل لمشكلة الرجاله اللي "استبنتو" والبنات بتتحرش بيهم. طب هو انت لما تلبس البنطلون الاسكيني والتي شيرت الساقط لنص صدرك وتطولي شعرك وتجيبه على جمب ولا تعمله "كيرلي" وتوقف "متأصع" وحاطط ايدك في بعض وشابكهم يبقى انت كده هتعجب البنات ؟! "ابسلوتلي" يبني البنت عاوزه راجل يحميها يغير عليها مش يبدلوا في لبس بعض؟! يعني على كده حبيبتك تقولك "يا بيبي عاوزه البنطلون الاسكيني بتاعك أخرج بيه النهارده" ولا ممكن تقولك "أنا خارجه أشتري توك واكسسوارت أجبلك معايا" هيبقى شكلك ايه ؟!. في اللي هيطلع يقولي حريه ومش حريه.. بص يا واد يا بت، يوووه والله ظلمنا البت، المهم.. بص يا أمورة "الحريه انك تعمل اللي انت عاوزه بما لا يضر الآخرين".. وانت كده بتأذي مشاعرنا كرجالة آه والنعمة ده انت جايبلنا العار يا ابني. وكما قال البحبحاني "أخاف أن أعاكسها من ضهرها لا يطلع واد وأجيب ورا".. وعجبي.
