دنيا تلاهى

دنيا تلاهى زى الملاهى
مراجيح طالعة بينا ونازلة
مراجيح لفة بينا ودايرة
ناس بتركز تنشن
عايزة تفوز
وناس واقفة
وناس بتجرى
وناس تدوس
ناس أحلامها جنة
وناس كابوس
ناس تطلب قرش
وناس ترمى الفلوس
صراخ وضحك
وعيون بتبكى
على اللى راح
بنت بضفيرة
والجزمة حمرا فرنيه
ولد بجلابية وطاقية والدمعة فى عينيه
وتاه منى حبيبى
وأنا ماسكة فى إيديه
مشيت على شوك
أدور وأنادى عليه
جريت وقفت كتير وقعت
قلت نسيت ولا ادعيت
مشيت سنين جوايا جرحى
وحواليا تابوت
أنادى عليه يمكن يعود
يحررنى منى
يخرجنى من التابوت
يفتكرنى بكل حبى بكل شوقى
يشتاقلى لحظة ترد روحى
أشوف عينيه
تحيينى بعد موتى
وفى وسط الزحام
رد صدى صوتى
ما تناديش ما تحلميش
هى دى حدودك ما تفكريش
حضرى شنطتك زادك وهدمتك
وركزى على ورقة الامتحان
آن الأوان
خلص الزمان