م الآخر| وحياة أبوكم عاملونا زي الخواجات

احنا شعب اتعود على حرق الدم وكتر خيرها وسائل إعلامنا دايمًا من دقتها وإحساسها بالمسؤولية تجاه دمنا لازم تنشر الأخبار اللي تزود حرقة الدم وترفع الضغط اللي هو أصلاً عالي. خبرين اتنشرو وحرقو دمي أنا شخصيا لما قارنت بينهم، والخبرين عن حادثين، الأول عن تفجير طابا وبيقول: "وزيرا السياحة والطيران يودعان 19 كوريًا من مصابي طابا قبل العودة إلى بلادهم". السياح راس مالنا وضيوفنا اللي لازم نشيلهم ع راسنا مافيهاش كلام توديعهم للمطار أقل واجب نعبّر بيه عن تطمينا واحترامنا ليهم وأسفنا للعمل الإرهابي اللي قاصد يشوه بلدنا ويطفش السياح و يخرب بيتنا مافيهاش كلام. والخبر التاني كان عن تعرض عدد من متسلقي الجبال لعاصفة ثلجية في سانت كاترين اتسببت في نجاة 4 و موت 4 والمخرج محمد رمضان آخر من عُثر على جثته منهم.. شوفو كدا بيقول إيه: "محمود" حاول إنقاذ "هاجر" من عاصفة سانت كاترين.. فكان الرد: "متأسفين المفقودين مش أجانب". محمود اللي الخبر ع لسانه أحد الناجين حاول هو وزمايله ينقذوا صديقتهم هاجر أحمد مصطفى شلبي فكان رد الجهات المختصة بتلقي الشكاوى والاستغاثات "متأسف يا فندم مش هينفع طلب تصريح رحلة الطيارة من السلطات بياخد 10 أيام عشان مافيش أجانب" يا نهار اسود يعني لو كان فيه خواجة كانت الطيارة طلعت في ثواني أما للمصريين اللي حياتهم رخيصة تطلّع السلطات الترخيص بعد 10 أيام لما اللي تايه تكون خلاص الملايكة حاسبته دي مهزلة وكدا تبقى السلطات "بفتح السين مش بضمها" ارتكبت جريمة في حق أرواح مصرية تسلق الجبال سياحة داخلية محتاجينها تزود الدخل وتنعش الحركة اللي الجماعات الإرهابية نفسها تشلها في مصر مافيهاش كلام لكن لما مجموعة شجعان زي المتسلقين دول يموتو عشان المسؤولين في بلادنا مش بيحترمو غير الأجانب ومش بيتحركو لإنقاذ حد بسرعة غير لو كان أجنبي هنا الكلام ورسالتي لكل مسؤول في البلد اللي قام شعبه بثورتين عشان يتعامل باحترام وكرامة من اللي قاعد ع التليفون يتلقى شكاوى واستغاثات للوزير اللي بيتحرك بس عشان يتصور ف المطار ويستنى ف التشكيل الجديد للحكومة اتقوا الله في أرواحنا وحياة أبوكم عاملونا زي معاملتكم للخواجات مش أكتر.