م الآخر| ست البنات

وردة وف جنينة
محطوطة بين زرعين
ست البنات زينة
والطبع زينة الزين
العمر كان خمسة
زينة البنات قمرين
والضحكة كانت صافية
لحد ما جه غرابين..
صرخت بعلو الصوت.. الناس هتسمعهم
قتلو البراءة اللي.. كانت هتفضحهم
زينة البنات ماتت والجاني ف الأحداث
والتاني قالوا مختل راح منه الإحساس
والأم بتصرخ عصفورة ف الدنيا ...
راحت خلاص يا ناس
آآآآه يا بنتي أنا
مش مالكة غير المنى وحلم بالفرحة
لعب وجري وهنا
كل البراءة هنا وكل فهمك سنة
وردة ومقطوفة والدم سال منها
بالرغم من إنها شابت ف غير عمرها
راسمة كيان حلمها فرحة وضحك وغُنى..
ما شفتش دمعي أنا.. وكسر ضهري أنا ....
وهدم حلمي أنا بعروسة ف الكوشة
بنتي زي النسمة والكل بيحبها
آهِِ على قلبي.. عاوزة يا ناس حقها
مين اللي هيرجع قلبي لمكانه
وهو خلاص تاه وضاع منه عنوانه
ست البنات زينة والطبع زينة الزين
سرقوا الحياة منها وقالوا دي غلطة
تحت السن ومختل..
ما حنا عايشين ف سَلطة
زينة البنات راحت فوقي يا سُلطة
زينة البنات خافت!
زينة البنات صاحت..
زينة البنات راحت..
وكلنا ف مجتمع منه.. النجاسة فاحت