مدير مبيعات

من ابراهيم الأنور
ورد الجنانين تحية للشهداء بقلم ابراهيم الانور
___________________________________________
أبكي علي نفسي ولا ابكي علي ورد الجناين
المسك من دمهم ....... والعطر بيه زاين
يا للي قتلت الشهيد......عديت حدود خاين
أروي بدمعي قلبهم...واكتم في قلبي حزنهم
دم الحبيب علي هدمتي وسام..... وليه داين
عمري فدا عمرهم........وافدي وطن حلمهم
دفنوا بذور حلمنا
بارت بطون أرضنا
نبت البطون غالي
بكت عيون قلبنا
بدل الدموع دمنا
يبكي الفراق حالي
قطفوا زهور الوطن
زرعوا طبايع عطن
بعلو صوتي أصرخ وقول يا وطن
ورد الجناين فطن
أنتم دفعتوا الحياة تمن رخيص فيها
الدم دا عندها هو الحياة ليها
قلب الولاد درعي ..سلاحي مش شارة
سلاحي في كلمتي.. والكلمة بتارة
أضحك علي حالي..وابكي عليه تارة
ياللي ارتضيت بالهوان..ابن الهوان زايل
واللي بناه صرح شامخ..بقي للسقوط آيل
ملك الملوك ملكه باقي..وملك العبيد زايل
يا الف آآآآآه عل الولد
وألف آآآآآه عل البلد
والجرح لو يندمل
في جرح تاني بيتولد
ايه بعد موتك يا شهيد راح يتعمل
بكرة الستار علي حكم الخسيس ينسدل
واللي سابوه علي مر السنين مايل
راح بكرة يجي ويتعدل
ضي الكرامة بيتولد
انتي انحنيتي لسنين...ضهرك خلاص راح ينسند
لو ليا ألف...حياة يا غالية أديلك
أستني فجرك يبان أصلي وادعيلك
أدعي نهارك يطول ويضيء ضلام ليلك
أسجد علي طمي نيلك
وانده علي طرح جيلك
يا كل ورد الجناين
لو بعض وردك دبل
في ألف وردة بتتولد