انفراد| "الشاطر" ل"مشعل" في تسريبات قضية التخابر: اللي ضر أبوالفتوح إنه عايش «دور العصاية من النص»

نائب المرشد: «أبوالفتوح» قاد حملة تشويه ضدنا لم تحدث من قبل.. وهو أول واحد طلّع كلمة «استبن»

قال خيرت الشاطر، نائب مرشد جماعة الإخوان، في انفراد "الوطن" بتسريبات قضية التخابر في مكالمته مع خالد مشعل، رئيس المكتب السياسي لحركة حماس، "إحنا رصدنا في اليومين ثلاثة اللي قبل الانتخابات، هو حصل شوية أخطاء من عبدالمنعم في آخر 10 أيام في حملته الانتخابية، وبرامجه اللي ظهر فيها ألحقت به ضررا، وهما قروا ده بسرعة فبدأوا ينزّلوا ناس توجه الناس بتاعته لحملة حمدين صباحي. أما طلع مع عمرو موسى مثلاً ماقدمش نفسه كرئيس دولة «وكانت المناظرة بمثابة ردح متبادل بينه وبين عمرو موسى».. فالاثنين خسروا، فجزء من ناس عمرو راحوا لشفيق".
وأضاف "الشاطر" يتحدث عن أبوالفتوح: «لقد خسر أصواتا أيضا» بحديثه عن المرشح اللي عامل عملية في دماغه (د. مرسي)، وقال إن فيه ناس كتير في مصر يحصل لها ما كان قد أصيب به مرسي من ورم حميد ويتم استئصاله بطرق مختلفة. عبدالمنعم عندما كان في السجن كان يصاب بأزمات قلبية ويذهب لمدة 6-7 أشهر إلى مستشفى السجن، وإن أبوالفتوح تحدث كذلك عن مرض حمدين وأنه كان مصابا بالبلهارسيا".
وتابع "برضه هما سجلوا مسألة إنه أنكر إنه بايع مرشد الإخوان واتكلم عنها بشكل مزعج.. حديث في هذه النقطة حول انقلاب وانشقاق بعض العاملين في حملة أبوالفتوح عليه عقب علمهم بذلك «بأنه كان قد بايع المرشد».. وتعجب أبوالوليد "أحد الحاضرين في المكالمة مع خالد مشعل"، وقال يعني هو فيه واحد بتاريخه يدخل ما يبايعش يعني؟ وقال الشاطر بعد استفسار شخص فلسطيني موجود مع أبوالوليد: هو «أبوالفتوح» بايع مرتين؟ فقال له الشاطر: هو فعلا بايع مرتين.. المرشد الحالي.. دعم السلفيين له جاء متأخرا وعندما دعموه هربت منه أصوات من الليبراليين والعلمانيين وجزء من المسيحيين اللي كانوا هيدوله".
وقال الشاطر تعليقا على ما حدث من أخطاء اقترفها أبوالفتوح "قبل أيام من الانتخابات الأجهزة المختلفة رصدت «هذه الأخطاء» فنزلوا بشكل كبير جدا في معظم المناطق، وبعض المناطق دية أعطت لحمدين على أساس إن ده مرشح ثوري وكلام زي كده".
وأضاف "الشاطر": "إن أخطاء عبدالمنعم استُفيد منها من قبَل الأجهزة الموجودة.. وقال: «هو المرة دية مستوى التخطيط عالي بشكل واضح، فيه ناس أعلى من الناس اللي عندنا.. «كلمتين سابقتين غير واضحتين / ممكن تكون «عندنا هنا فى مصر»، لكن ليست واضحة بشكل تام»، المرة دية واضحة أوي أوي يعني الموضوع المرة دية عالي أوي أوي أوي في طريقة تخطيطه".
وتابع: "إن السلفيين لسنوات طويلة بيهاجموا عبدالمنعم وبيتكلموا عنه إنه هو غير إسلامي، السلفيين كانوا منزّلين كتاب: «لماذا لا يقوم السلفي بدعم مرشح الإخوان المسلمين في برلمان 2010؟» اللي هو آخر انتخابات قبل الثورة واتزورت، واحنا كنا منزّلين ناس، هما ليه السلفيين مادعموناش، مطلعين كتيب فيه 17 نقطة نقد على الإخوان والتشكيك فيهم وفي عقيدتهم.. 12 نقطة من ال17 مبنيين على عبدالمنعم، فيهم إن عبدالمنعم أبوالفتوح الذى زار نجيب محفوظ، والذي «وافق» على تدريس رواية أولاد حارتنا التي تسب الذات الإلهية لطلاب المدارس، وإن الإخوان من بينهم أبوالفتوح الذي قال بولاية القبطي في رئاسة الجمهورية، وجواز تولي المرأة رئاسة الجمهورية، ودية كلها كبائر عند السلفيين.. ودية كانت حاجة بيقولوها في دروسهم في المساجد.. وبعدين عبدالمنعم أما راح مثلاً هما عملوله مؤتمر في الإسكندرية.. السلفيين هما اللي نظموه، فهو عايش دور «العصاية من النص» فييجي عبدالمنعم على المنصة موجود ونادر بكار، المتحدث الرسمي باسم الجبهة السلفية، وفي الجهة التانية آثار الحكيم الممثلة وشعرها سافر.. أبوالوليد: ده في مؤتمر السلفيين؟ الشاطر: ده مؤتمر معمول والسلفيين هما اللي منظمينه ومنظمينه طبعاً للسلفيين وللجمهور بصفة عامة، فهو يجيب دول يتكلموا مع عبدالمنعم فى المؤتمر، عايز يخفف حدة إن السلفيين بيدعموه بيبعت رسايل طمأنة للتانيين فمسألة إن إنت تمسك العصاية من النص وتحاول تقرب كل الأطرف دية ضرت.. أبوالوليد: هما قالوا إنه ماحسمش اللون بتاعه، صح؟ الشاطر: آه، لا انت فلول ولا انت إسلامي
ولا انت ناصري، لكن مسألة إن انت عايز تقول إنك كل دول، فمسألة مش سهلة.. يا أبوالوليد الناس بتشتغل في أرض غير أرضها (ضحك). أبوالوليد: بس أهم شىء مش فلول.. الشاطر: إن شاء الله، فهم موقف السلفيين ماكنش جيد من عبدالمنعم.. أبوالوليد: اتحسبوا عليه فأضروا بيه.. وقال الشاطر إن الذين أيدوهم من السلفيين حوالى 100 ألف وإنهم لم يتحركوا بشكل جيد لدعم الإخوان لأنهم لو تحركوا لكان من الممكن أن يكون هناك 2 مليون صوت وليس 100 ألف فقط من السلفيين «لصالح الإخوان».. فهو استخدم المال واستخدم دعم الأجهزة وخلى الجنود تروح تصوت، وأثّر على السلفيين بالنسبة لعبدالمنعم، وخلى الأقباط كلهم يدوا لشفيق ولحمدين صباحي".
واستطرد في حديثه عن أبو الفتوح "في نفس الوقت عمل حاجتين تانيين مهمين جداً الحاجة الأولانية تشويه إعلامي وحملة قذف إعلامى غير مسبوق في تاريخ الإخوان حتى ولا في عهد عبدالناصر ولا في عهد مبارك، تفتح أي قناة والدنيا الموجودة كلها مفيش إطلاقاً أي حاجة بتتقال في حقنا كويسة، واستخدموا تكتيكات مدروسة بشكل على مستوى عالٍ من الناحية النفسية، يعني مثلا مين اللي طلع فكرة كلمة «استبن» وترويجها بشكل ضخم لأنه في مصر الكلمة ليها دلالة ومش الأصل الاحتياطي، واستبن يعني عجلة، ودايماً في المصريين العجلة الضعيفة التعبانة هي اللي بيخلوها احتياطي، يعني انت النهارده أما بتيجي تشتري 4 عجلات ما بتشتريش 5 وبتشوف أحسن واحدة منهم وتخليها استبن، فده جزء من ثقافة المصريين.. أبوالوليد: الكل «عنده الموضوع ده»".