م الآخر| إني خيرتك فاختار ما بين الأسود والقطران

مبدأ غريب تربينا عليه، الكل كان يعاملك بهذا المبدأ.
أبوك، أمك، خالك، عمك، بياع الحلاوة بتاع زمان، مُدرستك في ابتدائي، وأُستاذك الغلس في إعدادي وثانوي، والدكتور المادي في الكلية، ومديرك في الشغل، و.... ، و..... إلخ إلخ إلخ.
صح ؟؟؟
مافيش حد فاهم حاجة !!
يعني إيه بقى الكلام ده ؟؟؟
تعالى معايا نرجع بالذاكرة شوية كده.
- بابا عايز مصروفي نصف جنيه عشان الربع بقى ما بيجبش حاجة.
لا يا حبيبي مافيش غير الربع عجبك ولا مفيش خالص.
ماما عايز التيشرت (الأسود) ده.
- لا يا حبيبي (الأحمر اللي بيلمع) حلو شبه تيشرت ابن طنط سعاد مش عاجبك بلاش خالص.
مُدرسة الابتدائي: اكتبوا الدرس ده 20 مرة.
- كتير كده يا أبله.
لا مش كتير ولا أقول 30 مرة.
وهكذا.. يا تأخد درس عند مدرس الفصل اللي مش بتفهم منه حاجة يا تسقط، يا تشتري كتاب الدكتور اللي مش بيتفتح يا تشيل المادة، يا تشتغل أي شغل وخلاص بعد ما تتخرج وسيبك من الشهادة اللي معاك يا تقعد جنب أبوك وأمك، وإلخ إلخ إلخ.
وهكذا حياتك إلى أن يتوفاك الله، وتطلع عند ربنا تتعمل (باربكيو على الفحم)، لأنك عايش حياتك كلها مفيش أي حسنات في حياتك، عمال تسب وتلعن في الناس والدنيا والظروف والحكومة (هتجيب حسنات منين) وبعد ما فقنا وقلنا.
(ثورة، وحرية، وعدالة اجتماعية).
الكبار قالوا...
مبارك: (أنا أو الفوضى).
مجلس الشعب: (إخوان أو فلول).
انتخابات الرئاسة: (مرسي أو شفيق).
استفتاء 2013: (نعم أو النار).
مرسي: (أنا أو الدم).
استفتاء 2014: (نعم أو الإرهاب).
........: ( السيسي أو مرسي يرجع).
ونفس المبدأ في حاجات كتير.
(الشرطة أو البلطجية).
(الجيش يحكم أو الإرهاب يموتكم).
ليه دايما يا (كبار) بتخيرونا ما بين (الأسود أو القطران).
من زمان واحنا على هذا الحال مفيش اختيارات.
(تقبل الوضع أو تأخد على دماغك).
مين الجاني ومن المجني عليه ؟؟؟
ما تردش !!! عارف إنك هتقول أنا المجني عليه.
حقيقي لا أعرف من الجاني ومن المجني عليه، لأنهم تربوا على نفس المبدأ والأسلوب من (الآباء والمُعلمين والحكومة) في زمانهم، وهل عندما أكبر سوف أُربي أبنائي كما تربيت وسوف أفكر مثل (الكبار) ؟؟
يا ترى الأسود (مبدأ) ولا ( أسلوب حياة وأسلوب تربوي) ؟؟؟