م الآخر| فوق كده وصحصح

فوق كده وصحصح.. انت كبرت!
كبرت إزاي؟ انت هرتلت؟
ده أنا لسه بتنطط وألعب زي القرد!
صحابي هما هما وخروجتنا هي هي
ونفس الحاجات يا عم لسه بتأثر فيا
يبقى كبرت أنا إزاي؟
ده أنا لسه حتى مبطقش طعم القهوة والشاي
بضحك بصوت عالي
وآنا ولا على بالي
وأغني في الشارع،
معنديش أي مانع
يبقى إزاي أنا كبرت؟
دة أنا لسه بقرا مجلة ميكي
واتخانق مع صحابي... برينس هاري ده ليا مش ليكي!
انت سنك عشرين؟
أفتكر إنك ناضج وعاقل ورزين
واخذلي ثواني ويقولي بالي
ماهم كم شهر ويبقى ده حالي!
بس الحق يتقال... أنا اتغيرت عن زمان
يمكن فهمت أكثر الدنيا ازاي بتمشي
صحابي دول إخواتي،
مخفش معاهم ان في يوم متفهمشي
أهلي دول على الراس يتشالوا
مهما قلت ومهما قالوا
أحلامي اينعم مختلفتش كتير
بس إزاي هوصل؟ هنا بقا فيه شوية تغيير
أولوياتي اتغيرت، ده صح أكيد
من الآخر يعني عايز المفيد؟
أنا لسه أنا وهفضل أنا.
مهما زودت على عمري سنة فوق سنة
بتعلم أه واتألم ساعات
بس هتلاقيني كده دايما بضحك على نفس الحاجات