م الآخر| اتحرش براحتك

كنت كاتبة حاجة مختلفة في الموضوع ده، بس الموضوع اتطوّر معايا بعد الموقف اللي حصل، وأكيد بيحصل لبنات كتير زي، وللأسف الموضوع ده زاد عن حده أوي.
فاكر كده نفسك راجل؟ طب إنت كده مبسوط؟ طب إنت كده راضي عن نفسك؟ عادي كده تخوف بنات الناس وتتعدى على حرمتهم غصب عنهم؟ طب بتروح بيتكوا عادي ولا كأن حاجة حصلت؟ معلش هرزل على حضرتك.. لما تيجي تنام بتنام عادي طبيعي زي أي بني آدم؟ طب إنت بتعمل كده ليه؟ مش فاهمة إيه الرجولة في إنك تطلع كبتك وعقدك على بنات الناس؟!.
بجد حاجة تقرف، الواحد ماشي في حاله، يطلعله بلاوي كده من تحت الأرض، متقوليش أصل لبس البنات والكلام اللي مفيش منه فايدة ده، اللي بيحصل ده كتير بجد ومهزلة، أنا واحدة مبسكوتش عن حقي ومش هسكت، في غيري بيسكت، عشان إحنا في مجتمع متخلف، فاكر إن الواحدة لما بتدافع عن نفسها يبقى بتفضح نفسها.
لو إنت راجل اعترف بغلطك، وقول مش هكرره تاني، متبررليش بتبريرات سخيفة، عشان تسمح لنفسك تتعدى على واحدة في الشارع، سواء بكلمة قذرة أو نظرة سخيفة، أو بحركة أو بتعدي جسدي.. ماهو إنت لو مش قادر تتحكم في غرايزك تبقى حيوان، مع الاحترام للحيوان طبعًا، مش قادرين قولوا ونعملكوا إبادة جماعية عادي جدًا، إنتوا مش هتسيبوا فراغ في الحياة.
إذا كنت فاكر إنك بتعدّيك عليا بقيت راجل في نظر نفسك وبتضعفني، فأحب أقولك: إنك في نظري بتبقي أقل من أقل حشرة، واللي بتعمله ده بيقويني أكتر، وبيخليني أسعى عشان اقدر أعمل حاجة أواجهك بيها، وبيخليني أحقق ذاتي أكتر وأبقى أحسن منك ومن أمثالك، وهيخليني أسعى عشان أخلص من أشكالكوا.
ومن دلوقتي، أنا ببدأ حملة لا للتحرش، وبدعو لوقفة يوم 5 / 2 / 2014 في كل ميادين مصر، للمطالبة بوضع قانون رادع ضد المتحرشين، والمطالبة بمحاكمتهم محاكمة عاجلة، وبلاش شغل البيروقراطية المتعفنة دي وتمويت القضايا، ومطالبة الحكومة بايجاد حل للمشكلة دي، وكمان مطالبة وزارة الداخلية بتكليف الضباط والعساكر للوقوف بالشوارع وحمايتنا، ومطالبة وزارة التعليم بتعليم رياضات الدفاع عن النفس في المدارس، بما إننا في بلد مبتجيش إلا بالصوت العالي، فهنعلي صوتنا لحد ما مطالبنا تتحقق، عشان إحنا بجد قرفنا.
وآخر الكلام، كما تُدين تُدان، واتحرش براحتك كمان، وأخرتك هتكون على إدينا في الليمان!.