م الآخر| مصر بتقولك

مصر يا مصريين بتناديكم وبتقول إنها محتاجة إنكم تقفوا جنبها، بتقول إنها مش عايزة أي حد يقعد في البيت وقت الاستفتاء على الدستور، واوعى تقلل من أهميتك أو تستصغر نفسك أو تقول إنك فرد واحد ومش هتأثر، لأ هي بتقولك إنك غالي عليها جدًا لدرجة أنها ما تقدرش تستغنى عنك وإن مفيش أي حد تاني ممكن يملي مكانك هي محتاجة إننا كلنا نرفعها لفوق ولأعلى نقطة علشان نوصلها للقمة، مسألتش نفسك لو مكانك فاضي مين اللي هيشيل مكانك ؟؟؟ ساعتها هيكون عبء كبير قوي على اللي موجود ومش هيقدر يرفع كويس وبالتالي مش هنعرف نعليها للدرجة اللي ترضينا، مصر بتقولك إنك حتة من قلبها وملهاش رفعة ولا علو ولا سمو من غيرك، انت حبيب مصر الغالي على قلبها فلا تبخل عليها بنزولك، بتقولك عايزين نعزف كلنا سيمفونية جميلة وراقية يسمعها العالم كله ولكن من غيرك مش هتكمل السيمفونيه.
وبتقولك إنها مصرّة عليك جدًا علشان ترسم مع اخواتك لوحة كبيرة بترجم فيها عظمة وجمال مصر ومن غير ريشتك هتكون اللوحة ناقصة، لازم تملي مكانك جوه اللوحة وإلا هيكون فاضي ومش ممكن أي حد تاني يقدر يحل محلك، مصر عايزاك تملى مكانك علشان الدايرة الكهربائية تكمل وتنوّر، يعني من غيرك مش هيكون فيه فرح ولا احتفالات.
مصر بتقولك كمان إنها فرحانة جدًا بأولادها من الجيش والشرطة وإنهم وسام شرف على صدرها، وإنها بتحبهم جدًا لأنهم بيسهروا على راحتك في عز البرد وفي الأعياد والاحتفالات علشانك انت تكون في آمان، وبيضحوا بحياتهم علشانك بدون أي جميلة ومستعدين يضحوا بحياتهم لآخر واحد فيهم علشان خاطر عيونك يا ابن مصر الغالي.
مصر بتقولك هي كمان متأكدة أنك نفسك ترد الجميل وتقول لهم إنك ممتن جدًا لتضحياتهم ونفسك تعمل حاجة بجد هما يقدروا يحسّوا بيها، وهي إنك تخليهم يرفعوا راسهم بكل فخر لما تنزل وتبهر العالم كله بوحدتنا وتماسكنا وقوتنا، ساعتها إخواتك في الجيش والشرطة هيحسّوا بالفخر إنهم جزء من هذا الشعب المعجزة.
مصر بتقولك أرجوك أرجوك ما تنساش البطل العظيم اللي وقف جنبنا في وقت الشدة ومستعد يخوض ما هو أشد من أجل عيونك وإنك غالٍ جدًا على قلبه، ما تنساش مدى الفخر اللي حسيت بيه لمجرد أن البطل ده واحد مننا، وأن كل الدول اللي حوالينا وبتعاني نفس المشاكل اللي كانت عندنا بتتمنى واحد مثله فأقل شيء ممكن نعمله نخليه هو كمان يحس بالفخر بشعبه اللي هينزل علشان يرد لمصر مكانتها في قلب هذا العالم.
مصر بتقولك غمض عينك وتخيل كده طوفان البشر اللي هينزل وهو كله سعادة وتفاؤل ورد للجميل لكل اللي وقف جنبنا سواء من داخلنا أو من خارجنا اللي هما إخواتنا العرب، ينفع نخذلهم؟؟ أبدًا أبدًا ولا ممكن يحصل، تخيّل كمان لما كل العالم بيتكلم علينا وهو منبهر وبيقول شفتوا المصريين عملوا إيه؟؟؟ دول كسروا كل المقاييس يا له من شعب راقي وأبي ومصر، تخيل كده وهما بيقولوا المصريين إنهم بيتكلموا عنك انت، أيوة لأنك نزلت وعارف إن الكلام موجه لك أنت شخصيًا، سوف تحس بكل الفخر وسيندم أشد الندم من لم يشارك.
آخر حاجة بتقولها لك مصر إنها بكل الفخر والحب سعيدة جدًا بكم يا من وقفتم بجانبها وعالجتموها من كل أوجاعها وآلامها إلى أن شُفيت تمامًا وكل هذا سيكون مدوّنًا ومسجّلاً في كتب التاريخ الذي سيدرس للأجيال المقبلة، فهذه النتيجة الحتمية والمؤكدة أنتم من صنعتوها يا مصريين فكن فخورًا بنفسك إلى أبعد حد،
وارفع راسك فوق انت مصري.