إحنا آسفييين يا "سبااايدر"

من كام يوم تابعت، زي ناس كتير أوي، المواجهة اللي عملتها واحدة من القنوات الفضائية بين أحمد سبايدر وأبلة فاهيتا. والحقيقة ما اهتمتش أبدا بالانتقادات الكتيييييييير اللي جت لأخونا "سبايدر" ع الفيسبوك وتويتر والهزار والتريقة، ده ناس بتاخد بقشور الأشياء وبتبص لنص الكباية الفاضي، قررت إني أشغل دماغي وطلعت بنتيجة واحدة إني هاكون "سبايدر ستايل".
أولا: أنا باطالب بالقبض على الناس اللي عملت إعلان لبان "كوكو واوا" بتاع زمان، لإن ده أول حاجة خلت الخرطوش يدخل مصر، والدليل إن شكلها شبه بلية الخرطوش، ثم إن كلمة "كوكو" معناها "خرطوش" باللغة السبايدرية، وكلمة "واوا" معروفة؛ هي التعويرة اللي هايعملها الخرطوش. تاني حاجة باطالب بالقبض الفوري على كل اللي شاركوا في إعلانات "مولتو" الجديدة، لإنها مشتقة من كلمة "مولوتوف"، أو يمكن معناها قنبلة لإنها شبهها يعني.
وكمان هاطالب بمحاكمة كل اللي أنتجوا أو مثلوا أو شاركوا أو شافوا فيلم "زورو"، بالصدفة حتى، لإن ده كان مخطط خارجي لنشر ثقافة "البلاك بلوك" في مصر. والحاجة الأخيرة إن يتم القبض على اللي صَّنعوا شوكولاتة "فلوتس" بتهمة إفساد الكورة في مصر، لإنها أول حاجة الأولتراس استمدوا منها فكرة الشماريخ اللي كانوا بيرموها في الملاعب.
بس لو هانتكلم جد بقا، اللي حصل بين سبايدر وأبلة فاهيتا ده شيء في منتهى الخطورة، وأعتقد إنه لازم نقف عنده كتير، لإن للأسف الجيش والأمن القومي والكلام عن العمالة بقا لبانة في بُق أي حد عايز يعمل شو إعلامي، أو يشوشر على حد مش طايقه ومش نازل له من زور، والجيش أكبر من كده، مش كده ولا إيه؟