انزلوا قولوا لا للدستور

إلى كل النخبة والثورجية وأي حد بيتثورج...
إلى الميدان الثالث..
إلى اللي من فوق حزب النور، ومن تحت إخوان وجهاديين..
رسالة من واحد من شعب مصر...
إنزلوا قولوا لا للدستور زي ما انتو عايزين..
والشعب هينزل قصادكم يقول كلمته ويحافظ على ثورته..
انزلوا قولوا زي ما تحبوا، بس لما الشعب يهزمكم لابد أن تتواروا خجلاً من أنفسكم قبل أن تخجلوا من الشعب.. الشعب اللي بيحب جيشه وبيكره أي حد يمسه بسوء أو يقول عليه عسكر... الشعب اللي كفاية إنه ينظر حواليه لسوريا ولا ليبيا ولا السودان ولا العراق ولا اليمن علشان يعرف قيمة جيشه.. الشعب اللي ميهموش دساتير ولا غيره.. الشعب اللي عايز يعيش ما هو عايش بقاله 3 سنين من غير دستور.
الشعب اللي فقد الثقة فيكم كلكم، نخبتكم بحقوقينكم بثورجيتكم.. الشعب اللي اكتشف إن مفيش مؤسسة بتخرج رجال غير المؤسسة العسكرية.. لما شاف مرسي مجتمع بالنخبة ومرشحين سابقين للرئاسة في مؤتمر أمن قومي مذاع ع الهواء، وكل واحد يدلو دلوه علشان يكتشف شعب مصر إن كل الناس دي مجرد فقاعات هواء.
شعب مصر يا أيها النخبة، اللي لما يتسأل نازل تقول نعم ليه.. يقول علشان أنا حاسس إننا في زعبوبة ولازم مصر تخرج منها.. شعب مصر يا أيها النخبة، اللي مستعد يجوع وياكل طقة واحدة في اليوم، بس يحس إن بلده في أمان مش مقسمة، بلده حره مش تابعة.
انزلوا قولوا لا للدستور.