والدة الطفل الشهيد تصرخ: «هاتولى حق ابنى.. أقول إيه لابوه.. الإخوان قتلوه وضربوه بالطوب فى الجنازة»

خالد أبوبكر يطالب بطرد سفير قطر بعد فضيحة قناة «الجزيرة» وزعمها أن الطفل «إخوانى»

ب«وصلة من الصراخ والبكاء»، تحدثت والدة الطفل محمد بدوى، شهيد العمرانية ضحية مظاهرات الإخوان، خلال مداخلة تليفونية مع الإعلامى معتز الدمرداش فى برنامج «مصر الجديدة»: «منهم لله، أنا ماليش ذنب وست قاعدة فى البيت وابنى نزل يجيب علبة كشرى، أنا ذنب ابنى إيه؟ كانوا جابوا ابنهم ضحوا بيه، أنا مين يجيب لى حقى؟ حسبى الله ونعم الوكيل، أنا قاعدة قدام المشرحة من امبارح، أنا ذنبى إيه يا كفار؟ حسبى الله ونعم الوكيل، أبوه محبوس وكان طالع الشهر اللى فات وما طلعوهوش، لما أروح أزوره أقوله إيه لما يسألنى عن ابنه؟ طلعولى أبوه، أنا عندى 28 سنة، ابنى فى رقبتك، هاتلى حقى، أنا قاعدة فى بيتى، قالوا لى ابنك مات انت عندك ضنى، روحت شوفته لقيت رصاصة جوه صدره، كانوا يجيبوا ولادهم يضحوا بيهم، هما بيضحوا بأولادهم؟ يا حرقة قلبى، يتحط فى التلاجة يومين، ابنى طالع بجنازته الإخوان ضربوه بالطوب وانتوا بعد ربنا هاتولى حق ابنى، انتوا عندكم ولاد، هاتولى حق ابنى».
وظهرت الدموع فى عينى مقدم البرنامج معتز الدمرداش وردت وزارة الداخلية على مكالمة الأم وقالت إن وزير الداخلية كلف مدير مصلحة السجون بفحص حالة والد الضحية.
واستضاف البرنامج فى نفس الحلقة جار الطفل الذى نقله إلى المستشفى وفضح قناة الجزيرة وقال إنها كاذبة وقالت إنه إخوانى ووالد الطفل، وروى تفاصيل نقله للمستشفى وقال إنه كان يتابع المسيرة و«ظهر بها ملثمون كانوا يحملون السلاح وأطلقوا النار وفجأة سقط أمامى الطفل الضحية محمد بدوى وهو صديق ابنى وجارى ووالده صديقى». وطالب المحامى الدولى خالد أبوبكر «الخارجية» المصرية بطرد السفير القطرى من البلاد بعد الكذب والفضائح التى تبثها قناة الجزيرة القطرية عن مصر، خصوصا فى واقعة طفل العمرانية محمد بدوى، 12 سنة، الذى قالت «الجزيرة» إنه إخوانى وخطف بلطجية جثته من والده بعد قتله. وثبت كذب «الجزيرة» وأن الذى كان يحمله هو جاره وأن والد الطفل محبوس فى قضية مخدرات وأن الطفل كان فى الشارع لشراء علبة كشرى.