محمد دياب يهاجم إسلام بحيري بسبب معز مسعود: "واضح إن الأستاذ غيران"

هاجم السيناريست والمخرج محمد دياب، الباحث إسلام بحيري بسبب هجوم الأخير على الداعية معز مسعود بسبب البيان الذي أصدره عن زواجه من الفنانة شيري عادل.
وشارك دياب، منشورًا كتبه بحيري عبر حسابه الشخصي على موقع التواصل الاجتماعي "فيس بوك"، وعلق عليه قائلًا: "بما إني تم التحفيل عليّ قبل كده فعارف إن الرد على الكلام اللي بيتقال وقت الموجه عبث، ورغم كده بما إني شاهد على كلام معز عن خطوات الشيطان بما إني من مؤلفينه فكلامه صحيح ودقيق".
وأضاف: "خطوات الشيطان كان البرنامج الدرامي الوحيد اللي اتكلم عن إرهاصات الإرهاب سنة 2013 و2014، وكلمة الدرامي تعني اللي كان على شكل مسلسل، وصناعة المسلسل اللي نزل 20 يوليو 2013 خدت قبلها 7 أشهر ما بين كتابه وإخراج وده يعني إن الأفكار المطروحة مقرره من أكتر من 7 أشهر مش زي الأستاذ إسلام فاهم إنه مشي مع الموجة بعد 30/6".
وتابع: "البرنامج عرض بعد 30/6 بأيام، والدنيا كانت مولعة وفضلت مولعة سنين، ورغم كده عملنا موسم تاني أكتر جرأة وطبعا بسببه كان بيجي تهديدات وأنا شاهد على إن معز ساب مصر بسبب التهديدات دي".
وأردف: "واضح طبعًا إن الأستاذ إسلام غيران إن فيه حد تجرأ ودخل ولو من بعيد وقال إنه تضرر بسبب أحداث البلد غيره، ومسمي الكلمتين دول بتوع معز سطو على بطولات الشعب المصري اللي هي بطولاته يعني، وعلى فكره الأستاذ إسلام وقتها فعلاً كان شجاع ودي حاجة تحسبله، ولكن المفروض إنك باحث وبتحلل التراث وتيجي بوضوح تلوي دراع كلمتين واضحين وتحللهم على هواك، ده يخليك يا متعمد تغالط يا مبتعرفش تحلل وتستخلص من الكلام الواضح مع إنها المفروض شغلتك.. مش عارف مين فيهم أوحش".
واختتم حديثه قائلًا: "حقك تنتقد اللي عاوزه في آراء وتصرفات معز أو غيره بس من غير تدليس للحقائق وعامة أوعدك لما هتجيلك وقعه وتلاقي موجه التشييل عليك مش هتلاقي من واحد زي معز غير الإنصاف وحسن الظن لأنه إنسان محترم ومن أحسن الناس اللي عرفتهم في حياتي".