لسه فاضل يوم.. هتيجى؟! قبل ما تسافر وأشوفك ولّا هتسيب قلبى يشحت طلتك بين القهاوى ويلم دوسك م الطريق ويشم حبات التراب بعد الخطاوى انت عارف إنى عايشة فيها يمكن كالغريبة بنت تاهت من كتاب الألف ليلة لحضن وهم لا يوم قابلتك صدفة فوق كوبرى الأحبة ولا حفرت من الشجر ف المنتزه قلبين وسهم ماعرفش إن كانت حقيقى إسكندرية بس قادر رغم حزنك.. بيا تسكر سيبنى أكون الكاس ف إيدك وأبقى بيك المؤمنة والكل كافر سيبنى أكون ونسك ف عيدك نجمة بتسامر طريقك لو تسافر خد دموعى رشتين برفان وقوم خد عيونى العطشانين ف البعد نوم وخلى قلبى ف انتظارك قبل ما تسافر بيوم نجلاء نعيم يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي [email protected]