خدت لفه جوه جيب الليل خرمته
نط منه اتنين تلامذة فى ابتدائي
بنت سمرا ديل حصانها ربع طولها
واد معفرت زيه تبحث لن تلاقي
كان يوماتي
ينسى أى كتاب بقصده
كان يوماتي يهوى تذنيبة الحيطان
كات يوماتي
تنسى هي كتابها برضه
كات يوماتي
تبقى فى نفس المكان
تبقى دايما جنب منه
آه يا حظ الواد فى سنة
جوز عيال لكن يجنوا
واد طيابة وبنت نور
كل يوم يتقابلوا بدري
يجي يجري.. تيجي تجري
بس عمر ما حد فيهم
كان لوحده في الطابور
صوتها بيحلي الإذاعة
صوته بيرج التحية
كات عنيها تشوفه تفرح
ينسجم لو شافها جاية
لما كان في الفصل يعطش
كات عينيها الزمزمية
وأما كان حد يضايقها
م العيال أم الغلاسة
كان يرد الحق ليها
بالغباوة وبالسياسة
حب طاهر م المظاهر
والعيوب الإنسانية
حب صافي مية مية
عدت الأيام عليهم
كل حاجه هي هي
قلعوا لون الابتدائي
لبسوا لون الإعدادية
الولد كره المدارس
اللي جيباها السنين
لما أصبح وحده قاعد
جوه مدرسة البنين