أحبيبتى يا كوريا الشمالية

كانت المرة الأولى التى نلتقى فيها، عرفنى أحمد النعمانى بنفسه كمهندس يعمل الآن فى الخارج.
- فين فى الخارج يا باشمهندس؟؟
- فى كوريا.
كوريا الجنوبية بقى اللى بنغلبها فى الكورة دى، والناس اللى شبه بعض دول؟
- لأ.. كوريا الشمالية سعادتك..
كنا فى مطعم آسيوى، والرجل لديه مشروع طموح عن النشر الصوتى للأدب المصرى، وراح الرجل يشرح بحماس مأساة المصريين والعرب فى الخارج، حيث لا يحظون بمتعة قراءة الكتب العربية الجديدة إلا بصعوبة، وكان مشروعه -ولا يزال- هو التعاقد مع المؤلفين ودور النشر المصرية لنشر كتبهم صوتياً، بحيث يستطيع الناس فى الخارج شراءها وتنزيلها من موقع على الإنترنت يحترم حقوق الملكية الفكرية، ولا يستطيع أحد سرقة محتواه، لكن التجربة نفسها، مع أهميتها، لم تأخذ اهتمامى بقدر ما جذبنى حديثه عن كوريا، لا سيما حين سألته:
- إنت متجوز هناك بقى وكده.. متجوز كورية يعنى؟؟
- لأ.. أنا أصلاً متجوز الحمد لله، وبعدين فى كوريا الشمالية الجواز ممنوع للى زيى.
- لا يا راجل.. يعنى المصريين ممنوع يتجوزوا واحدة من كوريا الشمالية.. الصين مش كده خالص على فكرة، بيدوهالك ويدوك الصيانة بتاعتها معاها.
كنت أمزح لكن الرجل كان شديد الجدية والاحترام وهو يكمل:
- عشان تتجوز واحدة كورية شمالية لازم تتوافر فيك شروط معينة أهمها إنك تكون قضيت سنين كتيرة أوى فى كوريا.
- يا نهار أبيض.. كوريا كوريا يا ابنى.. كوريا اللى إحنا نعرفها؟؟.. كوريا بتاعة ماتشات الكورة اللى الكابتن الجوهرى الله يرحمه كان بيخلينا نلعب معاها ماتشات ودية عشان نغلبها وناخد ثقة فى نفسنا؟؟ كوريا بقت بتتشرط ع اللى هيتجوزوا.
- إنت برضه بتتكلم على كوريا الجنوبية.. أنا بقول لك كوريا الشمالية.. الشماااليييية.
تركت الأكل الآسيوى بشوربة السحالى الغريبة التى أشربها (لابد أنها سحالى) بمزيج الأرز والبيض واللحم والصوص الآسيوى، ورحت أسمع له وهو يستطرد:
كوريا الشمالية يا سيدى فيها حكم ديكتاتورى كأنك بتتفرج فيه على فيلم كارتون.
يعنى الشعب الناس مش ملك نفسهم.. لأ
الشعب هناك ملك النظام الحاكم والدولة والحزب..
يعنى إنت تقريباً لما هتتجوز هتطلبها كأنك بتطلبها من الحزب مش من أهلها، ولازم الحزب يوافق عليك.
فى كوريا الشمالية يا سيدى رئيس الجمهورية بتاع دلوقت.. هو ابن رئيس الجمهورية اللى قبله، وحفيد رئيس الجمهورية اللى قبله.. يعنى غالباً يعنى.. هو أبو رئيس الجمهورية القادم.. فى كوريا الشمالية يا سيدى اللى أمريكا بتعتبرها من محور الشر.. كان عندهم تجارب نووية، فقطعوا الكهربا عن كوريا الشمالية كلها 3 أيام يا مؤمن كاملين.. متواصل.. فى درجة حرارة تحت الصفر..
ولا حد اتكلم.. ولااااا أى اندهاش!!
فى كوريا الشمالية عاملين للشعب إذاعة داخلية فى كل البيوت مفتوحة على طول عشان الزعماء يكلموهم فى أى وقت ويدولهم تعليمات أو يقولوا لهم خطبة.
فى كوريا الشمالية يا سيدى الانتحار ممنوع.. سألته يعنى إيه ممنوع.. طب افرض واحد انتحر يعنى.
رد وقال لى: فى الحالة دى القانون بيقول إنك مش ملك نفسك، وإنك طالما انتحرت فهيتم إعدام كل أقارب الدرجة الأولى بتوعك فوراً دون شفقة ولا رحمة مهما كان سنهم..
فى نهاية اليوم صافحته متمنياً له العودة بالسلامة، لكن ذهنى كان مشغولاً بسؤال واحد:
لماذا لا يتركنا الإخوان، ويروحوا يأخونوا كوريا الشمالية براحتهم؟.
عجايب