«مودى» دعا للعصيان المدنى فى بورسعيد لأن «حق الشهيد لازم يرجع»

والده إخوانى ويحب مرسى ويرى فى العصيان المدنى بلطجة وخراباً لذا يخرج دون علمه

لا يخاف محمد عثمان، الشهير ب«مودى»، من ضياع العام الدراسى عليه، وله فى هذا منطق: «تضيع الثانوية العامة أحسن ما يضيع عمرى كله لو استمر الحال فى بورسعيد على ما هو عليه»، الشاب ابن ال18 سنة، كان أحد الداعين للعصيان المدنى قبل عدة أيام: «فكرة العصيان فى الأساس كانت عندى أنا ومجموعة من صحابى، بدأناها على صفحات طلاب من أجل التغيير، وهوليجنز العسكرية، وكنا من أوائل الناس اللى عملت دعوة للعصيان».. يتحدث «مودى» طالب العلمى فى الثانوية العامة، أمنيته الالتحاق بكلية العلوم أو الصيدلة لا توازيها أمنية، سوى نجاح الثورة وعودتها إلى أصحابها: «المسيرات من غير تصعيد ما بتجبش نتيجة، والنظام بيقول انزل الميدان براحتك اهتف ولا حد هايسمعك، عشان توصل صوتك لازم توقف المصالح الحكومية، ونعمل عصيان مدنى حقيقى».
خطة شباب بورسعيد الثائر بدأت بالتجمع فى عدة مناطق «المحافظة والسنترال وعلى المينا وشريط القطار»، والهتاف على العاملين فى هذه المناطق «اللى مش هينزل معانا دم الشهدا هايروح هدر.. وانتوا كمان ممكن تموتوا غدر».. الغريب أن الكل استجاب للدعوة، سابوا أشغالهم ونزلوا، حسب «مودى».
يلخص الثائر الشاب مطلبه ومطلب الجماهير فى بورسعيد فى «دم الشهدا يرجع»، كان أكثر ما فاجأه وأصدقاءه مشاركة بعض الفئات التى لم يكن يتصورها: «الناس متجاوبة جدا، رغم إننا بننزل من سنتين فى بورسعيد، أول مرة الناس تتجمع على إيد واحدة، وعلى المطلب ده، سواقين الميكروباص واقفين معانا وقاطعين الطريق، عشان الشهداء مش عشان السولار زى ما بعض القنوات قالت، أما أكتر ناس فوجئت بيهم فهم الستات الكبيرة والرجالة، لقيتهم ماشيين معانا وبيقولوا للموظفين انزلوا من المصالح حرام عليكوا هاتوا حق اللى مات، بعد ما كانوا بيقولولنا إنتو اللى بتقلبوا البلد».
«مودى» من أسرة إخوانية، لكنه يخالفهم الرأى والهوى، ينزل فى كل المظاهرات سرا دون علم أسرته: «والدى مؤيد للإخوان جدا ومع مرسى فى كل قراراته، وشايف إن كل اللى بيحصل فى الشارع ده بلطجة وخراب مش عصيان مدنى سلمى، هيتفاجأ لما يلاقينى معاهم، أحب أقول له إنت أكيد مش حاسس بحرقة قلب أمهات وأبهات اللى ماتوا، مستقبلى مش ضرورى يتحدد بالدراسة، أهم حاجة الناس اللى ماتت، وربنا يصبر أهاليهم لحد ما نجيب حقهم».
أخبار متعلقة:
بورسعيد تبدأ مرحلة "العصيان للجميع"
"الوطن" في أول أيام الاعتصام:الأهالي يتوعدون "مرسي" وإخوانه ب"القصاص"
من تجار المدينة الباسلة إلى مرسى :"هلاكك يبدأ من هنا"
الصحافة العالمية: بورسعيد شوكة فى حلق كل رئيس
جيران السجن يروون حكايات "الخوف" فى سنوات "الظلم"
«كفر الشيخ».. "دسوق"تنتفض ضد «الحسينى الإخوانى» بإغلاق كل المصالح الحكومية
الدقهلية تتضم ل«العصيان» الجمعة.. وتوقف جزئى لمصانع ومحال بالغربية بسبب «اشتباكات المحلة»
سيناء والسويس على خطي العصيان
"المنوفية".. تقضى 45 يوماً بلا محافظ والأهالى: نرفض تعيين إخوانى