ابن سيادة الريس يا بغل!!

يقول مليجى: «مش كان الريس يقولنا إنه دخل الانتخابات عشان يوظف الواد ابنه، وإحنا كنا ساعدناه فى الموضوع ده».. يبصق مليجى بصقته المعتادة، ثم يكمل: «الابتذال ملا الشوال والله يا أستاذنا.. إحنا ف وطن مبتذل». أسأله: هل يضايقك موضوع تعيين ابن الرئيس فى وظيفة فى المطار يا مليجى، فيرد: «مش العبارة.. ما احنا بلد ماشية وسايط يا باشا، وأزبلها نائب كان بيعين قرايبه ف شركات البترول أو يجيبلهم خطوط برايفت، بس هو إحنا عملنا ثورة عشان نكمل قلة الأدب دى؟؟». أحياناً يا مليجى أظن إنك إخوانى قح، وأحياناً أراك أجدعها من مليون جبهة إنقاذ، ودائماً لا أفهمك. يقول مليجى: «اللى زيكم لو فهمونا يموتوا يا باشا عدم اللامؤاخذة.. إحنا الشارع.. الملطوطين من أول اليوم لآخره.. اللى لسة بنلبس الشبشب أبوصباع، وبنزعل لو ضاع، ومش عايز أقولك بنقول إيه ساعتها، وعشان كده بنقول اللى لينا واللى علينا، إنما إنتو هتفضلوا كده.. تقولوا الحاجة وعكسها.. ترغوا كتير عشان بتحبوا اللوك لوك، وآخركم كلام من غير فعل». ياااه يا مليجى.. إلى هذه الدرجة فقدت احترامك لنا؟؟. يقول مليجى: «بص يا باشا.. مرسى ده لو عين ابنه عند الشاطر والا حسن مالك والا حتى سعودى.. هتقولوا عليه إيه؟؟.. هتنفخوه والا مش هتنفخوه؟؟». يا مليجى ليست هذه هى المشكلة، الولد خريج 2012 وخريجو السنوات السابقة لم يعينوا أصلاً، بخلاف حاملى الماجستير والدكتوراة الذين تم ضربهم والقبض على كثير منهم بعدما تظاهروا أمام بيت رئيس الوزراء من أجل تعيينهم و.. .. . يقاطعنى مليجى: «هى كلمة واحدة يحاسبك عليها ربنا.. لو ابنك هتبيعوا والا هتعينه»، قلت له أنا مش رئيس الجمهورية، فرد: «والواد برضه مش ابنك.. لما يبقى ابنك هتبقى تعرف»، همّ بالاعتراض لكنه يستطرد: «بلاش الموضوع ده خالص.. تقدر تقول لى إنتو ليه أغبيا لامؤاخذة».. لاحظ أن كلامك جارح يا مليجى. يرد مليجى: «لاحظ يا باشا إنكم مبسوطين بغباوتكم.. الإخوان بيعملوا بلاوى، وريسهم فاشل، وجماعتهم زى الزفت، وحلفاءهم ينفع يعملوا عروض فى السيرك، إنما إنتو كدابين وش.. بدل ما تفضحوا بلاويهم بتفضحوا نفسكم»، وكيف هذا يا عم مليجى؟. «قلت لى كيف هذا.. أقول لك أنا يا هذا.. الفاتورة المضروبة بتاعة أم أحمد اللى قعدتوا تزيطوا بيها وإنها عملت ساونا ودخلت مش عارف فندق إيه ودفعتلها كام ألف دولار.. بذمة أمك إنت مصدق نفسك لما تقول الكلام ده».. أهم بالرد فيكمل: «بلاش دى.. التزييط والهرى بتاع جواز ابن مرسى من بنت هشام قنديل.. طلع صح والا غلط وهرى بعد ما ف.. توا الراجل»، أهم بالرد، فيقاطعنى من جديد: «بلاش برضه.. الناس اللى عمالة تطلع براءة من صفوت الشريف لفتحى سرور لزكريا عزمى.. جايين دلوقت تقولوا هو اللى مطلعهم؟؟!!، وهو إنتو بعضمة لسانكم زمان مش كنتوا عارفين أن العسكر ساجنينهم حركات.. تقوموا سايبين العسكر وماسكين فيه هو عشان نفذ القانون»؟؟. امسك يا عم مليجى.. جميل.. أين القانون إذن فى موضوع النائب العام والبلاغات والاتحادية؟؟ أين القانون من القتل والسحل والضرب فى الشارع وانتهاكات الداخلية التى تتواصل ضد كل من ينزل؟؟أين.. .. .. يقاطعنى: «طب وهو فين القانون بتاعكم من بتوع البلاك بلوك اللى لما يتقبض على حد فيهم هتعملوه بطل وتتضامنوا معاه.. فين القانون بتاعكم من قفل المجمع وقطع المترو واللى لما يتقبض على حد فيه هتزيطوا فى الزيطة.. فين القانون من اللى بيرمى مولوتوف ع القصر الجمهورى ويحاصر بيت مرسى فى الزقازيق كل يوم جمعة.. تيجى نطبق القانون بقى من غير زعل.
قلت له: وهل ستساوى بين الفعل ورد الفعل، فرد: حمرا يا باشا.. نظرت له بغضب فاستطرد: الإشارة سعادتك.