هذا الشبل من ذاك مراة الأسد (مليجى +19)!!

بعد النجاح المبهر الذى حققه «مليجى» سواق التاكسى الأبيض، وهو يحلل الأوضاع أمس، عرض عليه الظهور فى أكثر من برنامج لكنه اختص المقال بتصريحاته الحصرية عن الأحداث، وقد طلب مليجى أن يكون المقال لمن هم فوق ال19 وليس ال 18 لأن (السنة دى بتفرق فى الفهم يا باشا). خلاص يا عم مليجى.
يقول مليجى: «الراجل محافظ كفر الشيخ الإخوانى ده اتثبت يا باشا وفيه ناس بيقولوا إنه خدله بشلة فى حتة حساسة ماتخليهوش قادر يقعد». قلت له إن الحادثة صحيحة، لكن لا دليل على موضوع المنطقة الحساسة، فرد ساحباً نفساً من العمق: «طب خليه يطلع فى أى برنامج وهو قاعد على حيله يا باشا وأنا أبطل سواقة أصلاً». قلت له إنه يبدو سعيداً ل(تثبيت) سعد الحسينى وسرقة سيارته وهو المحافظ بجلالة قدره، فرد: «طبعاً مبسوط.. أصل الناس دى ما بتحسش بالموضوع غير لما بيحصل فيها. يعنى قلعه كده البنطلون وعريه واسحله وخليه يطلع يتكلم بعدها.. موتله حد من عياله وساعتها هيحس بقيمة الضنا، ويسفلت وزير الداخلية». سألته عن رأيه فى وزير الداخلية، فقال: «أهو نفس طينة سيده العادلى.. هذا الشبل من ذاك مراة الأسد.. ناس كتير ف بلدنا كده مش هو لوحده». أطلق مليجى سباباً شهيراً بكلاكس التاكسى، ووصم أم سائق (جيب شيروكى) بما لا يطيقه بشر، ثم نظر لى وهو يقول: ما هو أمه اللى جايبهاله هدية.. ما اتحرقش بأقساطها زى ما إحنا بنتحرق.. عالم وس.. .. قاطعته قبل أن يكملها: شفت فيديو (بوابة الوطن) يا عم مليجى.. زميلتنا (رغدة أيمن) جابت فيديو لست بتكلم حمدين صباحى و.. .. قاطعنى هو هذه المرة: «أيوة أيوة اللى خدته غسيل ومكواة دى.. يا لهويييى.. دى ظبطته». قلت له: لكن حمدين صباحى كان هادئاً وثابتاً وتحملها، رد مليجى: «مش كفاية إحنا متحملينه هو اللى معاه.. يا عم الحاج دى الست بتقول له: إحنا مش عارفين نصدق مين فيكم وهو بيقول لها: والله ولا أنا عارف!!! تقول له: إحنا زهقنا منكم وزهقنا من الكلام يقول لها ما أنا عارف!!! طب خليك حسيس بقى يا أخى!!!»
ضايقنى مليجى، فسألته: إنت إخوان يا مليجى؟؟، فرد: «أهو ده اللى إنتو فالحين فيه.. تحب أشتمهم بالأم عشان تصدق إنى مش إخوان؟ يا باشا كلكم أنيل من بعض، وربنا يخلصنا منكم كلكم ونرجع نبنى على نضافة عشان التغيير على -لامؤاخذة- وساخة.. بيجيب تسلخات، واحنا اتهرينا مراهم». مررنا بجوار مجلس الوزراء، فعاد مليجى للشتيمة بالكلاكس لخمس دقائق كاملة لم يسمعنى فيها، ثم أطلق بصقة كبيرة على البوابة، والتفت لى أخيراً: «كنت بتقول حاجة يا باشا»؟.. قلت له: يبدو أنك حانق جداً على هشام قنديل رئيس الوزراء مع أنه رجل طيب وحبوب ومؤدب و.. .. . قاطعنى كعادته: «طب ما انا أمى طيبة وحبوبة ومؤدبة.. ما أجيبها تعمل وزارة بالمرة». بصق مرة أخرى من النافذة فناولته منديلاً بصق فيه ورماه من النافذة أيضاً، واستطرد: واحد سايب البلد بتولع وبيقول لك إن معظم أمراض الأطفال عندنا عشان الست ما بتنضفش (كلمة عامية عن الثدى) وهى بترضع.. أنا مراتى كانت بتتفرج عليه فقالتله وش كده: طب كما تيجى ترضع إنت أحسن.
كنت قد اقتربت من الوصول، فسألته: البلد رايحة على فين يا مليجى، فرد: و(نهضة) أمى ما أنا عارف.
ناشدته أن يدعو لمصر فرفع يده للسماء وهو يقول: اللهم ارزقنا بحد (كفاءة) عشان احنا زهقنا م (الخرونجات).. قول آمين.