«كل وقت وله استايله وموضته»، ليس المقصود هنا اختلاف فصول السنة فحسب بل اختلاف وقت الخروج أيضاً، فملابس الخروج وقت النهار تختلف بطبيعة الحال عن خروجات الليل أو سهراته، هناك من قام من الشباب بعمل استايل خاص به لنفسه بتحديد الملابس الكاجوال نهاراً والكلاسيك ليلاً، وهناك من يضرب بالقوانين عرض الحائط، وبين هذا وذلك مصممو أزياء يعملون من أجل اختيار المظهر الأنسب والألوان التى تتفق مع ضوء النهار والتى تختلف بطبيعة الحال فى الليل أو فى حالة وجود سهرات فالوضع هنا يختلف تماماً. خبراء ينصحون ب«الفيروزى والنبيتى والمارون» نهاراً.. والغوامق ليلاً إنجى شريف (22 سنة)، تقول: «فى الصبح بحب ألبس ألوان فاتحة زى البينك والأبيض وأخضر، ولو هاضطر للغوامق فى النهار يبقى كحلى أو جملى وبالنسبة للإكسسوارات بتبقى متناسقة مع ألوان اللبس ومش بتبقى أُوفر طبعاً، عشان ده نهار، مينفعش ألبس فصوص بتلمع الصبح الأفضل حاجات بسيطة سلسلة أو عقد، والكوتشى الصبح أو بوت حسب الجو، أما بالليل بافضّل ألبس غوامق أكتر خاصة الأسود، وفى الصبح مش بحب أحط ميك أب خالص، مجرد بس حاجات موحدة للون البشرة». وعلى العكس قالت عبير طارق (22 سنة): «باحب ألبس اللون الأسود فى الصبح والليل برضو، فى الصبح بافضّل ألبس جينز عليه وفيه ألوان زى الأصفر والبينك والبربل، وبالنسبة للإكسسوارات بالبس عقد، وبالليل بلبس غوامق وعلى رأسها الأسود». وكان للشباب رأى آخر، تحدث عنه عبدالرحمن أحمد (20 سنة): «أنا فى الصبح بأفضّل لبس التى شيرتات الخفيفة أى حاجة سهلة اللبس ومتضايقنيش فى الحركة، بحب ألبس البلوفر جداً سواء على بناطيل جينز أو جبردين وفى الغالب بالبس عليه جزمة ده من أفضل استايلاتى وشيك جداً، والألوان أن يكون قطعة غامقة وقطعة فاتحة». قدمت عارضة الأزياء أمنية فاروق نصائح بخصوص اختلاف الملابس نهاراً وليلاً، وقالت: «بالنسبة للبنات فى النهار يفضل الكاجول مناسب جداً للنهار والمشاوير والخروج للنادى والجامعة وارتداء الجينز والكوتشى، تقدر تلبسه على أكتر من استايل مختلف، والبلوفر عملى جداً وبسيط، النهار عموماً وبالنسبة للألوان المتعارف عليه أن ألوان الشتا والخريف غامقة، ويفضل ألوان جريئة وربيعية اللون مثل الفيروزى موضة السنة دى، وممكن ارتداء الجيب نهاراً برضو ويفضل لبس بالرينا فلات للنهار، بيضيف بساطة وشياكة وسهولة فى الحركة، والألوان البنى والبيج دى ألوان أساسية للشتا مناسبين فى الليل والنهار، مفضل جداً للبنت اللى بتشتغل». وأضافت عن موضة شتاء وخريف 2016: «النبيتى والمارون دول ملوك الألوان فى شتاء 2016، ولقب باللون الذهبى وهو لون أساسى فى دولاب أى بنوتة ومناسب ليل ونهار، وأخيراً من أحلى الألوان ارتداء اللون الأسود أو الأسود فى أبيض مع الكعب المناسب للخروجات الليلية زى الكافيهات أو عيد ميلاد أو عمل الشوبينج». وأكملت: أمّا بالنسبة للشباب، فى النهار مناسب له جداً لبس البلوفرات وتحتها قميص سادة أو كاروهات. وأضافت أن من أشيك الاستايلات الشبابية هو استايل البليزر مع الكوفية ومناسب جداً لخروجات النهار حيث يميل الشباب إلى اللبس الكلاسيكى أكثر، واللون البيج مع الكوفية الكحلى ألوانها متناسقة مع البليزر وبنطلون من نفس اللون». وعن الماكياج قالت مروة يحيى، خبيرة التجميل: «الفرق بين ماكياج النهار وماكياج الليل، إن ماكياج النهار يتسم بالبساطة فيفضل وضع كريمات الأساس الخفيفة جداً على البشرة التى تعطيها لمعة وإشراقة ونضارة مثل الكريمات التى تحتوى على نسبة مرطب ووقاية من الشمس وتغطية بسيطة لعيوب الوجه كما يتم استخدام الألوان الفاتحة فى ماكياج العيون مثل البيج والروز الفاتح والأوف وايت، أما عن ماكياج الليل فيتيح مساحة أكبر لاستخدام الماكياج.
