فتح الفنان تامر حسنى النقاش مع كل محبيه من جمهوره عبر حسابه الرسمي على موقع "فيس بوك" وقال :" ساعات كتير ببقي نفسي اتكلم معاكوا و آخد رأيكوا في حاجات او ألفت نظركوا لحاجات جايز تكون مفيدة لأحلامكوا فحبيت إنهارده أتكلم في موضوع مهم اوي معاكوا و هدخل اقرأ كل اللي هتكتبوه في الموضوع" . وتابع تامر :" مثلا انا عايز كل واحد فيكم يكتب هو نفسه يحقق ايه في حياته و ايه احلامه بس رجاء خاص اننا نتكلم جد و كلنا نحترم كلام بعض و كل واحد يكتب ايه هو حلم حياته و الأمنية اللي دائماً بيطلبها من ربنا". وعلق عدد كبير على الفنان تامر حسنى بالكثير من الأمنيات والأمال والتى تمثلت فى امنية ايجاد فرصه عمل براتب جيد، ومنهم من ذكر قصة شخصية تربطه باسرته وبحبيبته وباصدقائه. وعلق الفنان تامر حسنى رداً على جمهوره من المتابعين له قائلا:" اولاً ربنا يحقق لكم كل احلامكم ويفرح قلوبكم ويشفي كل مرضانا وينصر شعوبنا، ثانياً انا فرحان جدا ان الموضوع اخد شكل ايجابي من ناحيتكم وكل واحد قال اللي في قلبه بجد و شوفوا يا جماعه انا حبيت اتكلم وادخل جواكوا لأسباب كتيره اولها اني بحبكوا والاهم ان انا نفسي كلكوا تنجحوا وتحققوا احلامكم وعارف تماماً ان الفتره دي صعبه في حياتنا كلنا والجيل ده فعلاً عاش فتره صعبه من التخبط وفجأه شاف حاجات كان لا يمكن يتخيلها انا قرأت كل كلامكوا وفرحت اوي ان كلكوا عندكوا احلام لان مهم جداً انكوا تحلموا مهما كانت الظروف صعبه لازم تحلموا وإوعوا تتخيلوا ان الأحلام مش بتتحقق انا قدامكوا اهو بدأت من تحت الصفر في ظروف ماديه منعدمه وفي انفصال اسري و تعبت وسهرت واتجرحت وياما ناس اتريقت على طموحي واحلامي وقالولي يابني انت مجنون ورغم ان ماكانش معايا فلوس خالص ولا عربيه ولا حتى عجله بس كان معايا اسلحه رهيبه اقوي من اي شيئ". وذكر تامر حسنى لجمهوره أدواته فى الوصول الى حلمه قائلا: " إيماني بأن لكل مجتهد نصيب ، الصبر والعند والأمل والاجتهاد ، معرفة قيمة الوقت وشطارتك هتستثمره في أيه لازم كل واحد فينا يخطط لمستقبله من اللحظه دي ويقسم بالله انه من اللحظه دي هياخد اول قرار لتغير مسار حياته للأفضل مثلا يمتنع عن صفه او عاده سيئه فيه ويبدأ صفحه جديده مع نفسه يدور على شغل بسيط لحد مايلاقي حلمه الأكبر مش عيب انك تبدا من تحت الصفر العيب انك تقف تتفرج ذاكر انجح رتب مراحل حياتك واكتبها بجد قول انا لازم انجح في دراستي وبعدها لازم اشتغل وانجح في شغلي لازم اكون شخص مشرف لأهلي ولبلدي لازم اعوض تعب اهلي لازم اكون شخص ايجابي مركز في أحلامه مش في الناس. قول لازم اوصل للي بحبها ولازم تكون فخوره بيا ماتركزش مع اي شخص يحاول يهدك ابعد عن اي صديق يشدك للخلف و اوعى تقول ظروفي عشان في ناس ظروفها اصعب وصممت تنجح وتوصل ونجحت فعلاً و وصلت لأكبر المراكز يلا كلنا من دلوقتي كل واحد فينا ياخد قرار ينفعه ولو عايز تفيد بلدك ابدأ بنفسك".