بالرغم من مرور اكثر من 6 شهور على عرض فيلم "الفيل الأزرق" بدور العرض عندما طرح فى شهر يوليو 2014 بمناسبة عيد الأضحى المبارك، الا أن ثمة تصريحات جديدة للناشط السياسى سامح ابو العرايس حول الفيلم أثارت ردود أفعال نشطاء مواقع التواصل الاجتماعى، ووصل الأمر الى رد الفنان خالد الصاوى بطل فيلم "الفيل الازرق". كتب أبو العرايس على صفحته بموقع "فيس بوك": "الشباب الهايج على الدولة الأيام دي هو بسبب التعزيمة السحرية اللي قالها خالد الصاوي في فيلم الفيل الأزرق وأيامها لما قلت كده الناس استغربت . التعزيمة دي كانت بكلمات بابلية وعبرية قديمة وتؤثر على ناس كتير من اللي سمعوها وتجعلهم تحت سيطرة اليهود لتحريكهم ضد الدولة. يعني الشباب دول مسحورين علشان كده لو اتكلمت مع حد منهم تلاقيه اتنرفز واتعصب لأنه مسحور وتعرض لتعزيمة سحرية !!". وكتبت الفنان خالد الصاوى رداً على تصريح أبو العرايس على حسابه الرسمى على موقع "فيس بوك" قائلا: "انا بقالي خمس دقايق بضحك لحد ما دموعي نزلت فعلا وده لم يحدث لي ابدا مع اني بقالي خمسين سنة بضحك". وأضاف، نتكلم جد حبة بقى.. ادعو دارسي العبرية -قديمة وحديثة- والضالعين في البابلية -وبالمرة الاشورية والسريانية- ان يأخذوا فاصل قصير من اي شيء بيعملوه ويقروا هذه القطعة النادرة من طرائف المواطن المدعو أبو العرائس مع احترامي لكل العرائس -من عروسة المولد الى العروسة اللي بيخرموها درءا للحسد- وبعد ما يضحكوا ويدمعوا يردوا على معاليه بالعلم اللي هو طارح نفسه كمتبحر ضليع فيه. وتابع أما الجزء اللي يخصني ولازم أقوله المرة دي " لما نزل الفيلم تطوع البروفيسير سامح عرايس بتحذير الناس من التعويذة للاسباب بتاعته وكدت أرد فطلب مني مخرج الفيلم وصديقي العزيز مروان حامد تجاهل الامر فسكت لأنه قائد العمل وانا اقدس الانضباط المهني، لكن المرة دي مفيش اي خطر عالفيلم من لغط يناله، زائد ان البرنس عرايس عدى منطقة الهيس الى الوقاحة واتهامنا بحاجات اكبر من ان اي حد يعديها" . مش عارف رأي المحامي حيكون ايه لأني حاسس اني محتاج احبسه بصراحة اكراما لبقه اللي بيشر سب وقذف في حقي وانا عضو بكل الحركات والموجات الوطنية من سن 17 لسن 50 يعني من ايام ما كان سامح ابو عرايس لسه عروسة صغننة! ويضيف الصاوي: "وختاما يا سادة.. التعويذة في الفيل الازرق مش اي لغة، دي حاجة اخترعناها انا ومروان واحمد مراد المؤلف وهي عبارة عن كم سطر كتبهم مراد بالعربي ثم قلبنا الحروف بس كده.. ان المطلوب نحسس المشاهد انها لغة من عائلة اللغات الشرقية القديمة اللي ممكن نائل يتكلمها لحظة غضبه وتكبره فيواجهه البطل اللي حل اللغز باسم من اسماء الله الحسنى -المانع- فيتحرق". وتباع الصاوي: "عذرا اخي مروان واخي مراد كان لازم اوضح للناس -حتى لو سامحت في حقي فمش حقدر اسكت عن حقهم في معرفة ما لحق بهم من اساءة وتضليل يصلوا لمرحلة الفسق فنحن هنا امام تهم واطية -خيانة وشيطنة وصهينة بلا اي سند وبالباطل فقط بهدف الايقاع بين الناس واشاعة الشك في بعضهم بل وزعزعة سكينة الايمان جواهم وهو ما قد يرقى الى مرحلة الشرك بالله طبقا للعقيدة الاسلامية -والله اعلم- حيث يعلن أبو عرايس ان سبب الاضطراب عائد لا الى القضاء والقدر بل الى تعزيمة شيطانية وسحر".
