ننشر نص كلمة الرئيس السيسي في احتفال الكلية الحربية

أعرب الرئيس عبد الفتاح السيسي عن شكره وتقديره لأسر الطلاب التي سهرت على أولادها لتقديمهم لمصر ، كما وجه الشكر والتقدير إلى جميع الشهداء والمصابين من الجيش والشرطة والشعب ليس فقط على مر الثلاث سنوات الماضية ولكن على مر السنين .
وفيما يلي نص كلمة الرئيس عبد الفتاح السيسي: -
كمان فيه مناسبة جميلة بعد أيام قليلية إن شاء الله .. رمضان كريم ..فكل عام والمصريين بخير بمناسبة هذا الشهر ..مش عارف هيبقى فيه صرف كتير في الشهر ده ولا هنحاول نظبط المسألة شوية ..يا ريت نقدر يبقى شهر كله عمل .. إصرار على العمل عشان خاطر بلدنا عشان خاطر مصر.
بنتكلم عن إن فيه تحديات كتير جدا موجدة في مصر وخارج مصر .. في مصر احنا شايفين ان فيه تحديات اقتصادية وتحديات امنية داخل وخارج مصر.. هناك تحديات كثيرة موجودة في مصر وخارج مصر، ومصر نحن نشاهد أنها تواجه تحديات اقتصادية وحتى تحديات أمنية داخل وخارج مصر وهناك جهد كبير يبذل لكي نتجاوز ونتغلب على هذه التحديات.
وهنا تحية واجبة أو مستحقة للقوات المسلحة والشرطة المدينة لأنهم بفضل الله عماد الأمن والاستقرار في مصر والجيش المصري بصراحة هو مشكلة أمام أي حد يحاول أن يقترب من مصر في الداخل والخارج لأن الجيش المصري هو الضمير الحر للوطنية المصرية المؤسسة العسكري في مصر.. الضمير الحر للوطنية المصرية ، وأن الجيش دة بتاع مصر مش بتاع حد وعمره مكان بتاع حد ونحن حريصون على أنه يكون كذلك .
مصر أمانة في رقبتنا كلنا والمنطقة العربية كمان أمانة في رقبتنا كلنا ونحن قادرون إن شاء الله على حفظ الامانة بوحدتنا وتماسكنا وتفهمنا ونكران الذات والإيثار كله علشان خاطر بلدنا ومستقبلها.
من المهم أوي أن أفكر نفسي وحضراتكم جميعا انني قولت دايما سأكون معكم بشفافية وبصدق وبأمانة لانها مسؤوليتنا جميعا ومش مسؤوليتي بمفردي كان إمبارح في نقاش حول موازنة مصر الخاصة بعام 2014 /2015 ولمدة 6 ساعات كان هناك نقاش مع رئيس الوزراء ووزير التخطيط ونخبة أخرى من الوزراء.
أنا عاوز أكلمكوا بمنتهى الصراحة إن العرض الموجود .. وأنا قولت مقدرش أوافق عليه وكان المفروض مفيش كلمة أنا مجهزها للموضوع دة دلوقتي وأنا بكلمكوا لأن دة مسؤولية ومسؤولية الاجيال القادمة الي احنا هنسيبلهم بلدنا فوجدت عجز الموازنة بيزيد .. يعني المديونية هتطلع إلى أكثر 2 تريليون جنيه علشان كدة الموازنة اللى ممكن متعملش مشكلة مع الرأي العام في مصر لأن الموقف السياسي من وجهة نظر الحكومة لايتحمل.
طيب وبعدين يعني كل سنة منجابهش تحدياتنا ومشكلتنا بجد لغاية البلد ينفع يعني فقولت أنا هكلم الشعب المصري بكل وضوح كدة ان العشر شهور الي فاتو عدو لا.. كان في أشقاء موجودين وواقفين معانا بس يا ترى إحنا هنفضل كدة ولا أية .. يعني هنفضل كدة ولا ممكن نيجي على نفسنا شوية ولا حتى شويتين ..احنا بنحرج نفسنا وبنحرج الناس.
انا عاوز أقولكم على حاجة أنا قولت للحكومة مش هقدر أصدق على كدة وكمان مفيش برلمان بس أنا قولتلهم إني مش هكلمكم بصراحة.. طيب وانا مكلمكمش ليه يعني.. ومكلمش المصريين ليه يعني واقولهم ان احنا عندنا اجراءات محتاجين ناخدها محتاجين نيجي على نفسنا شوية دول المصريين جدعان أوي ورجالة أوي وحتى الستات بتاعتهم رجالة أوي بصحيح.
قلنا نراجع الموازنة لأن أنا مقدرش أتحمل إني أوافق عليها ويكون بها هذا العجز عجز يعني سلف والدين الداخلي والخارجي لمصر يطلع من 1.7 إلى 2 ترليون و100 مليار، ودول بيبقوا عاوزين خدمات وفوائد لهذا الدين يعني عبء أكثر علينا ..لا أنا مش هقدر أوافق على كدة طب احنا محتاجين نعمل اجراءات ده صعب اوي الكلام ده .. أنا قولت قبل كدة ان هذا الشعب لم يجد من يرفق به ويحنوا عليه ..أنا أريد أن أرفق بهذا الشعب واحنوا عليه وعاوز اخلي بالي من ولادي اللي جايين نسبلهم حاجة كويسة واحنا كدة مش هنسبلهم حاجة كويسة .. احنا لو فضل الدين يتزايد بالشكل ده مش هنسيب حاجة كويسة.
أنا قولت ان انا ما كنتش مجهز كلمة لحضراتكم واتكلمت بمنتهى الصراحة معاكم وانا بقول لينا جميعا أنا كان كلامي قبل الانتخابات ان احنا محتاجين سنتين نبذل فيهم جهد وناخد فيهم اجراءات ثم بعد كدة ننطلق بفضل الله سبحانه وتعالى ..هينفع ان احنا نطالب بمطالب فئوية تاني !!.. انا بصراحة عاوز اقول ان اللي بيطالب ده مش واخد باله البلد مش هتستحمل كدة وبصراحة انا مش هقدر ألبي مطلب واحد فئوي مش هيحصل.
لابد من بذل تضحيات حقيقية من كل مصري ومصرية ، أنا بأحصل على مرتب الحد الاقصي وهو مبلغ 42 ألف لن أخذ نصفه وسأتنازل عن نصف ممتلكاتي من أجل مصر .
لو كل واحد حط بلده أمام عينيه ومستعد لاعطائها وخاصة أن عدد المصريين كبير سواء في الداخل أو الخارج ، لو قمنا باعداد حسابات يسيطر عليها بشكل جيد وأشرف عليها شخصيا هل نقدر أن نجد مساهمة من المصريين في الداخل والخارج اللي قادر بدون ضغط وبدون حرج .
أنا أسف انني أتحدث عن ذلك في هذه المناسبة لازم أتحدث اليكم يا مصريين لقد وضعتم الامانة في رقبتي ، وهي في رقبتنا جميعا ولذلك سنحتاج الى اتخاذ اجراءات كي نستطيع حل هذه المسألة وبقول لكل مصري ومصرية ساعدوني، ساعدوا مصر.
وأشكر الجميع كل المصريين ، الوقت ده وقت التكاتف ، وقت الوحدة وقت مصلحة الوطن ، وأنا متأكد بفضل الله سبحانه وتعالى وأنا ادعوه أن يساعدنا لأن مصر تمر بظروف صعبة وهو قادر على كل شىء .
وأخر حديثي عن أحكام القضاء حصل نقاش كثير على الأحكام التي صدرت من القضاء ، أول اتصال بيني وبين وزير العدل أثناء مجلس الوزراء قلت له لن نتدخل في أحكام القضاء ، وفي اتصال السابعة صباحا مع الوزراء يوميا للاطمئان على أحوال البلاد وقلت لن نتدخل في شئون القضاء، لأن القضاء المصري مستقل وشامخ، مؤسسات الدولة لا أحد يقترب منها ، لا أحد يعلق أو يتكلم عليها إذا كنا بننشد دولة مؤسسات فلابد أن نحترم أحكام القضاء ولا نعلق عليها حتى لو الآخرين لم يتفهموا هذه الاحكام .
وأخيرا أشكر المصريين وأطلب مساعدتكم لبلدكم مصر ، وكل عام وأنت بخير ، تحيا مصر .