تعليقات إعلان "أبلة فاهيتا" : اتعرفتوا يا فوادفون يا إرهابيين..ونشطاء : حد يصدق عنكبوت ؟ من حق سبايدر وعكاشة يركبوا البلد بعد ساعات من الإعلان عن تحقيق نيابة أمن الدولة العليا مع شركة «فودافون» بعد بلاغ من أحمد سبايدر يتهم الشركة بنشر شفرات تحريض على أعمال عنف وتفجيرات فى إعلان «أبلة فاهيتا» عن شريحة المرحوم لشركة فوادفون ، علق متابعي سبايدر على الصفحة الرسمية للشركة في رابط الإعلان على فيسبوك ، مؤكدين صحة ادعاءاته بتحريض الشركة علي العنف. وقالت إحدى المعلقات على الإعلان " كله يجيب من يوتيوب ترجمة الإعلان بتاعت أحمد سبايدر وأنتم هاتفهموا هما عاوزين يوصَّلوا منه إيه للارهابيين بتوع مرسي"، مضيفة " حسبي الله فيهم اللي بيقتلوا شبابنا وجنودنا وشرطتنا". وعلق آخر " نحن فى زمن الفتن وكله بيبيع نفسه أنا عن خبرة ده إعلان مشفر فعلا"، وأكمل ثالث " أحمد سبيدر دا عبقرررررري دا أنتو هتتنفضو من أمن الدولة وانتو بقي اللى هتبقو المرحوم ان شاء الله"، فيما علق آخر قائلاً " اتعرفتو يافدافون كمبلة تحت مول". واستكمالاً لإبداعات "أصدقاء سبايدر" حلل أحدهم الإعلان قائلاً " أولا: مفيش إعلان يكون إكتر من دقيقة عمري ما شوفت كده قبل كده، وثانيا أول الاعلان بتلاقي المفروض شجرة كريسمس مش من الصبار هتلاقيها أربع صوابع ودي معناها رابعة وفيه في صوباع واحد كرة حمرا دي معناها قنبلة وموجود كمان حرف ال A ". وأردف " ثالثا هتلاقي بتقول صدور الديك الرمي محشية معناها إن العربيات تتحشي متفجرات وكيكة الكريسمس يعني الفرحة بعد التفجير، ورابعا: هتلاقيها بتقراه في كتاب الكتاب ده مسميه بنت الإيه كلنا عارفين معنى بنت يعني أمريكا بنتها إسرائيل و دي حاجة معروفة، وخامسا أبلة فاهيتا بتاخد التليفون وتقول لكركورة وطي التلفزيون يعني احتمال يكون التفجيرات هي الإذاعة والتلفزيون"، وسادسا لما بتكلم بطة بتقولها في الدقيقة 36 فكيتي معناها فكيتي الفلوس وبتقولها فريز يا بطة فريزر يعني الدنيا متلجة على الإخوان وبايظة عليهم، والحكاية دي متشفتش من أيام الدليسبس يعني من ايام جمال عبد الناصر ". واستطرد " في الدقيقة 46 هتلاقيها بتقول أبلة فاهيتا ماما توتو ماما دي معناها مصر وتوتو معناها الإخوان يعني إخوان مصر وبتقول متكلميش الإخوان لأن الجماعة باظت عشان بقت جماعة إرهابية ومستنينها تفك، وهتلاقي أبلة فاهيتا بتقول لكركورة فتشتي البلطو البيج يعني فتشتي في الجيش على الشريحة اللي هي أصلا الملفات، فتقتي بطرطو يعني بطرطو دي جاية بمعنى الاحتفال بالكريسمس، وهي لغيتي الاحتفال بتاعوا بالفجيرات اللي هتحصل في الاذاعة و التلفزيون ". وواصل في تعليقه" هتلاقي كركورة بتعمل زي الكلب هحهح هحهح يعني خليتي الجيش مش عارف بيعمل إيه من كتر التعب وبتقولها عضيتي يقتوا بمعنى بوظتي الاحتفال برده، وفي الدقيقة 1.11 الاعلان بيغلط نفس الغلطة وبيبان صوابع رابعة في توكة كركورة، وأبلة فاهيتا بتقولها روحي دوري في رف الدبلوهات بمعنى أن روحي دوري على الشريحة عند حكومة الببلاوي و الطابور الخامس ". واعتبر أن قول أبلة فاهيتا "مش لاقي شريحة المرحوم" تعني "ملفات المرحوم اللي هو المعزول وسموه المرحوم عشان اتعزل من الرئاسة"، وأنه " في الدقيقة 1.58 بتقول بعت سيكيورتي لجراج المول يعني ممكن مول من المولات يتفجر عشان يعرفوا يطلعوا المرحوم ". وفي السياق ذاته علق آخر قائلاً "اتضح أن هذا الأعلان له شفرة خاصة يتكلم من خلالها التنظيم الدولى للإخوان أعضاءه فى مصر وتم هذا الموضوع حديثا وحالياً امام الأمن القومى والمخابرات"، مستكملا " الموضوع بجد خطير والله وحده هو الحافظ والحامى لمصر". وعلى الجانب الآخر تهكم نشطاء على تعليقات المؤيدين لسبايدر، فقال أحدهم " جتكم وكسة مش عارفين تحموا مدريات الأمن وبتفكوا شفرات إعلانات"، وعلق آخر أن "التعليقات اللي على الفيديو تؤكد أن سبايدر مش مجرد شخص ده أسلوب حياة ..سبايدر لا يمكن يموت". ووجه ثالث رسالة لمؤيدي سبايدر قائلاً " يا عالم بتفهم وتستقي معلومتها من العنكبوت.. كل فشار"، وأضاف آخر " إحنا في مرحلة أهبلة الدولة"، فيما قال ثالث " خلينا نصارح نفسنا، إحنا عايشين في بلد تحتوي أكبر تجمع للمغفلين والحمقى في الكون، حق لأمثال عكاشة وسبايدر أنهم يركبوا ويدلدلوا ".