بعد إصابته بالبهاق.. رامي جمال: "الناس خايفة تسلم عليا"..وشذى: "فكك منهم"

نشرت الفنان شذى صورة لرامي جمال عبر حسابها الشخصي على إنستجرام، وردت على إعلان إصابته بمرض البهاق.
وقالت شذى: "أولا أنت فنان وفنان مهم وأنت قوي ومن معرفتي بيك أنت إنسان قوي اللي يخاف يسلم ميلزمكش وأنت لامس قلوب ناس كتير بألحانك وبأغانيك المرض ده ابتلاء من عند ربنا وأنت قده فكك من الناس اللي مبتقدرش.. دول مش مهمين لأن اللي بيقدروا أكتر بكتير".

وتابعت شذى: "ربنا يكرمك وينجحك أكتر ويخليك لكل الناس اللي بتحبك وأهلك ومراتك و (...) في الناس اللي ملهمش لازمة كلنا عندنا ابتلاءات، بس الناس بتشوف اللي عايزة تشوفوا ومن تجربتي أنا الشخصية في كمية ابتلاء أنا نفسي عشتها تكسر ضهر جمل بقولكً كمل وكلنا في ضهرك إحنا بنقوي بالناس اللي بتحبنا وبتدعمنا والحمد لله على المحن اللي بتعرفنا حبايبنا من أعدائنا.. ربنا يكتبلك الشفا من عندوا هو قادر على كل شيء".
وكان قد أعلن المطرب رامي جمال، مساء الأمس، إصابته بمرض البهاق، بعد ظهور بقع بيضاء اللون بجسده.
وقال رامي عبر حسابه في "انستجرام": "الحمد لله الذي أحبني فابتلاني وقدرني على الصبر.. من فترة ظهرت بقع بيضاء في جسمي، وبالكشف عرفت إنه مرض البهاق، وجربت أنواع علاج كتير، ودكاترة كتير، ومفيش فايدة".

وأضاف: "رضيت وسلمت أمري لله عشان عرفت إن الزعل بيزوده، وكفاية شغلانتي وصعوبتها والقلق الدائم من المستقبل، وفعلًا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان، واللي يخاف يسلم عليا، واللي يسألني هو ده معدي".

وتابع: "أنا بقالي سنة فعلًا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني أعمله عشان الناس مش هتقبلك كدة، وفكرت في كلامهم بصراحة".

واستطرد: "لاقيت إن عندي حلين يا فعلًا شكرًا لحد كدة على الشغلانة دي، رغم حبي ليها، وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو".