نور مانجا تكتب : رسالة من زوج مصري مفروس

عزيزتي الغالية ام الأولاد
تحية طيبة وبعد
ياحرمنا المصون انتي ست جميلة واصيلة ومدبرة وموفرة ومخلصة وكل حاجة بتعملي حاجات فوق الفظيعة عشان راحتنا وبتعملي حاجات فوق البديعة عشان سعادتنا وبتتضحي تضحيات فوق المريعة عشان توفريلنا كل ده جهد مشكور مبنكرش بس انتي كده عملتي زي لاعب الكورة اللي نسي الخطة ونسي ان معاه فريق بيلعب وعمل كل الأدوار وكانت النتيجة انه خسر الماتش عشان زي ماهو ما ينفعش لاعب واحد يلعب هجوم ودفاع ووينج يمين ووينج شمال وجون برضه متنفعيش مهما كنتي خارقة انك تبقي ام وسكرتيرة ومدرسة للعيال وطباخة وشغالة وبودي جارد ونجارة وسباكة وكهربائية واصلح بواجير الجاز اعمر
_التوفير
بتستخسري ترمي اكل العيال وبتاكلي بواقيهم والنتيجة دايما تاكلي اكل بارد معدتك مش مرتاحة قولونك بيستغيث وده بيطلع علينا في صورة عصبية وغازات وحجم بيذيد وبيرجع علي نفسيتك لأن الاكل الحلو من مسببات السعادة ولو انتي مش سعيدة فمش هتعرفي تسعدينا :بتستخسري تشتري لنفسك كل فترة كده بيجامة حلوة او تعملي شعرك او حتي شبشب بيت لطيف وبتلبسي شبشب ابنك وحتة من بيجامة جوزك علي حتة من الستارة والنتيجة اني انا والأولاد دايما شايفينك في شكل ام عطيات الشغالة لازم تعرفي ان مظهرك جوا البيت مهم زي برة بالظبط ان مكانش اهم عشان مترجعيش تزعلي مني لما ابص يرة معذور ياناس انا كده مش بخونك انا بدور فيهم علي القطة الحلوة اللي اتجوزتها واختفت
-مذاكرة الأولاد
يازوجتي يا حبيبتي انتي عارفة كويس قوي ان في بلدنا الحلوة دي العلم لا يكيل بالبتنجان والعيال لو حتي كانو ارشميدس واديسون مش هيبقو حاجة في البلد غير لو قرايب فلان يبقي مافيش داعي تتقمصي دور دراكولا الشرير وانتيي بتذاكريلهم يعني خليكي هادية هما كده كده بيتعلمو الحمورية في المدرسة والي بتعمليه ده هيقصف عمرك بدري بدري او ياستي خصصي يوم في الأسبوع متذاكريلهمش فيه والعبي معاهم هيحبوكي اكتر وترحموني من صريخكم كلكم وخصصي يوم تاني ريحي انتي فيه وانا هعمل معاهم الواجب عشان لما يتخرجو ان شاء الله رواد فضاء ابقي شاركت في الإنجاز العظيم دهون
_التمارين
حضرتك بتسيبي العيال ينامو طول اليوم في الصيف ويلزقو قدام التليفزيون وتيجي وقت الدراسة وطلبت معاكي نشاط حبكت يعني العيل يبقي خارج من المدرسة الساعة 3 تسربعيه يتغدي ويذاكر وينزل التمرين 5 عشان يرجع يعمل الواجب الساعة 7 ايه ياشيخة ايه ياشيخة بتحضري للأوليمبات ياخي ماللي بتعمليه في الشتا بيتمسح في الصيف انتي مش حاسة انك بتهرسي طفولته زي ما هرستي انوثتك الطفل اللي بيقضي طفولة تعيسة ياهانم استحالة يطلع اي حاجة كبيره يطلع السلم وختاما بقي انتي عاملة نفسك مشغولة ومضحية ونظام ضحيت هنايا فداه ليل نهار وانا مش لاقي معايا واحدة ست انا طول الوقت شايف كابتن سيد عبد الحفيظ بس ساعة ما تشمي ريحة انثي علي بعد عشرة كيلو تقلبي مناحة وتقولي خاني وباعني بعد ما نضفته المعفن يا حبيبتي مبنساش فضلك بس انتي اللي بتنسي وتنسيني انك انثي في البيت اعملي اللي تقدري عليه وبس فاهمة وبس وادي لنفسك كست مساحة صدقيني هتفرق كتير