عمرو أديب يهاجم رئيس الوزراء بعد حادث المنوفية: عرفت تنام ازاي؟

هاجم الإعلامي عمرو أديب، خلال برنامجه "الحكاية" المذاع على فضائية "إم بي سي مصر"، رئيس الوزراء الدكتور مصطفى مدبولي بسبب عدم تعازيه ووقوفه بجاني ضحايا حادث المنوفية الذي أسفر عن وفاة 19 من عمال اليومية، معظمهم من الفتيات.
فقال "أديب"، خلال برنامجه، في رسالة ل"مدبولي": "جايز اللي حصل المرة دي يخلينا نلاقيك جنبنا وجنب الناس مش جنب الثلاجات والغسالات و جنب المستثمرين، لأن دول اللي هيجبوا المستثمرين ويرفعوا البلد.. أنا مش عارف عملتها ازاي، ونمت امبارح ازاي، ومش عارف هتنام النهارده ازاي".
وتابع: "أنا بقولك الكلام دا عشان انت كبير، ومن أطول رؤساء الوزراء اللي قعدوا في هذا المنصب.. وسواء كنت قاعد أو ماشي كان لازم تاخد بالك من التفصيلة دي"، في إشارة إلى عدم تقديمه واجب العزاء لأسر الضحايا.
رسالة عمرو أديب لمدبولي
انتقد الإعلامي رئيس وزراء مصر في هذا الصدد قائلًا: "المهندس مصطفى مدبولي.. أنت راجل أصيل وطيب ومحترم وأخلاق ومن عيلة، أنا عايز أقولك معلومة عشان أنا بحبك، أنت لو عزيت كمان 10 دقايق ملهاش لازمة، كل حاجة في الحياة لها توقيت، ولا ليها لازمة ولا تساوي عند الناس حاجة".
وأضاف: "وزارة الخارجية الأردنية أرسلت التعازي لمصر ورئيس الوزراء مصر لم يعزِ حتى الآن". واستكمل: "ليه العند؟ بتعند مع 100 مليون، طبطب عليهم، أنت قاعد على الكرسي اللي كان قاعد عليه مصطفى النحاس، مش فاهمك وزعلان عليك، ده مش أنت أبدًا، هتفضل الحكاية دي علامة استفهام".
واسترسل: "أنا مش ضده ولا حاجة، أكيد عندك سبب.. شايف إنك محدش يضغط عليك عشان تعزي، المستشارين قالولك اوعى تعزي، كده هيبقى شكلك صغير قدام الناس!.. هو إيه العيب إنك تعزي الناس.. بصراحة أنا مش فاهم، مش قادرين تكتبوا سطرين؟!".
تم نسخ الرابط