رد فعل مفاجئ من أحمد التهامي بعد هجومه على تامر حسني

حرص الفنان أحمد التهامي، على تقديم الاعتذار للفنان تامر حسني وذلك بعد الهجوم الذي شنه عليه بسبب فيلم "تاج".
كتب التهامي، عبر حسابه الشخصي بموقع "فيس بوك"، "توضيح هام :أحب أوضح سوء التفاهم اللي حصل بخصوص البوست بتاعي اللي كتبته بخصوص فيلم (تاج) اللي أتفهم غلط لإن أي حاجة كتبتها علي صفحتي لازم برده أوضح وأرد علي صفحتي أنا لم أقصد أن أوجه أي أسأه أو هجوم علي النجم تامر حسني أو علي أسرة فيلم تاج ولا للشركة المنتجه بالدليل أنا قولت تامر أخويا وحبيبي".
أضاف، "ولكن كل ما بدر مني إني قولت إن فكرتي ممكن تكون تداولة في الوسط الفني دون معرفة اي طرف انها تخصني وإن تامر وصناع الفيلم لم يكن لديهم علم بأي حاجة عن فكرتي وهذا ما أوضحه أمام الجميع أنا كنت عاوز أقول إن كان ليا السبق في تقديم نفس فكرة التوأم الخارق لشركات إنتاج أخري ولم تنفذ ..ولكن تامر مبدع و شاطر وممكن تتشابه الأفكار ولكن التناول والطرح مختلف وأنا من محبين تامر جدا علي المستوي الشخصي والفني و الإنساني لإنه ناجح و إنسان محترم".
أردف، "وشكرا للشركة المنتجه وبالأخص الأستاذ أحمد بدوي علي أهتمامه وتواصله معايا وأنا أوضحتله كلامي وهو أكدلي إن مافيش وجه شبه بين قصتي (خلف×خلاف) وقصة فيلم (تاج) لا في التناول ولا الطرح وإن فيلم تاج مختلف تماما حتي في الشكل الدرامي للتوأم الخارق ..وكل التوفيق لأسرة فيلم تاج وأنا لا أملك غير كل حب وأخوه وأحترام لأسرة فيلم تاج كاملا .. مع خالص أعتزاري عن سوء الفهم للفنان تامر حسني و جمهوره".
وكان هاجم الفنان أحمد التهامي الفنان تامر حسني بسبب فيلمه الجديد "تاج" حيث قال إن الفكرة مسروقة.
كتب التهامي، عبر حسابه الشخصي بموقع "فيس بوك"، "أنا سكت كتير عن حقي عشان ما زعلش حد مني اتشلت من أدوار كتير وقولت مش مهم ولحد دلوقتي مش واخد حقي الفني والأدبي والمدى اللي يليق بمجهودي وتعبي في مشواري الفني.
أضاف، "قولت كل شيء نصيب والحمد لله على حب الناس والدنيا مستورة والحمدلله.. إنما توصل إن مشروعي مشروع عمري اللي أنا تعبت فيه كتبته ولفيت بيه على معظم شركات الإنتاج ولسة عندي يقين وإيمان بالله إن هييجي يوم وأعمله يتسرق مني ويعمله حد تاني بغض النظر ده فيلمي ومشروعي".
تابع، "أنا أول واحد من 10 سنين فكرت في فكرة البطل الخارق وطول الفترة دي كان يتسرق أجزاء من الفيلم وأقول عادي، إنما التوأم الخارق، ده بتاعي ومسجله في المصنفات والشهر العقاري".
واختتم، "تامر حسني صاحبي وأخويا وأكيد ما يعرفش المعلومة دي أرجو الرسالة توصله لأن أكيد في ناس كتير مؤذية وحسبي الله ونعم الوكيل.. أنا حاولت أوصل لتامر حسني ومعرفتش".
يذكر أن آخر أعمال تامر حسني فيلم "بحبك" وشارك في بطولته هنا الزاهد، حمدي الميرغني، مدحت تيخة، هدى المفتي، أحمد عزمي، وتميم عبده وسمر محمد متولي، وغيرهم.