ياسمين عبد العزيز تتصدر تريند جوجل بعد "خناقة" شقيقها واعتراف أحمد العوضى بحبه لها

تصدر أسم الفنانة الكبيرة ياسمين عبد العزيز مؤشر البحث جوجل وذلك عقب هجوم شقيقها الفنان وائل عبد العزيز لها عبر صفحات الفيس بوك وقد كتب شقيقها على صفحته الشخصية على الفيس بوك
"بصي يا ياسمين يا عبدالعزيز يا أختي.. أنا معاكي وفي ضهرك من وانتي صغيرة، شيلت مشاكل كتير بسببك، من وانتي عيلة صغيرة، بداية من مشاكلك مع الشاعر، وبرادة وانتي عارفة، إن أنا اتأذيت فيها إزاي، وقضية الشغالات مؤخرًا، غير قضية الضرب اللي كانت بينك وبين بنت هشام سليم الممثلة اللي لبستيها التورتة في وشها".
وأضاف: "وقفت جنبك بكل ما أملك من قوة أدافع عنك في كل موقف صعب مر عليكي، ونسيت حياتي ونفسي عشانك وبقى كل همي أنا ووالدتك إنك تكبري وتبقي نجمة في مجالك، سيبنالك اختياراتك كلها لنفسك، ووافقنالك على معظم قراراتك، وكنت الوحيد اللي ساندتك، ووقفت جنبك في طلاقك".
واستكمل: "لكن هنهرتل وتروحي تعرفي واحد أصغر منك ب10 سنين، وتتصوري صور مالهاش أي لزمة على حساب سمعتك وسمعتنا، لا ومحدش هيسمح، من إمتى وإحنا بنعمل أعياد ميلاد، وتنزل على السوشيال ميديا.. من إمتى الناس بتجيب في سيرتنا؟ ونقعد نتعاكس على السوشيال ميديا، ومع ذلك حياتك وانتي حرة فيها".
وأوضح: "أنا هتكلم على الشق اللي يخصني.. انتي مقاطعة كل العيلة عشان تعملي اللي على مزاجك.. إحنا دلوقتي عايزين نفهم العلاقة دي إيه ورايحة على فين.. أما بالنسبة للأخ اللي ماشي وراكي في كل حتة، وشايفك البيضة الدهب اللي هتفقسله كل يوم، أحب أقولك يا راجل لما تيجي تدخل بيت، تدخله من بابه يا راجل! وتقعد مع رجاله البيت!.. دي الأصول وده الاحترام".
واختتم: "طبعا لأنك عارف إنك مرفوض رفضا باتا، فعمرك ما هتعمل ده، ومعندكش غير طريق الشمال، اللي أنت سالكه من سنين مع بنات الناس.. أنا من رأيي كفاية عليك البطولة اللي أخدتها، والعربية المرسيدس الهدية.. وتركز في شغلك وتسيبنا في حالنا، لأن طول عمرنا في حالنا، ومحدش سامع عننا حاجة، وملوش لازمة جو الصور والمعاكسات ده، وأنا مبخفش من تهديد حد".
ليرد الفنان أحمد العوضى على كلام الفنان وائل عبد العزيز أيضا على صفحته الشخصية على الفيس بوك وجاء رده كالتالى :
"انهى بيت اللى ادخله من بابه.. ان كانت هي اللى بتصرف عليه وعلى ابنك اللي مخبيه وراميه وهي بتدفعله مصاريف مدرسته.. باب ايه يا ابنى ادخله هو انا شفت راجل واقف جنبها.. دي واحدة انت مبتعملش حاجة غير أنك بتستنزفها هي ومامتها.. باب ايه يا ابنى الى هدخله من بابه واكلم واحد بيتكلم على عرضه ولحمه قدام الناس.. يا ابنى انا من عين شمس منطقية شعبية اتربيت على ان الأخت والام والست الكلام عليهم من الكبائر.. عربية ايه يا ابنى انا اجرى الحمد لله يعيشني كويس ويجيبلي عربية حلوة وبيت كويس.. بمجهودي وشغلي مش على عرق واحدة ست.. باب ايه يا حبيبي اللي ادخله وانت أصلا عايش باسمها.. انا شقيت على حالي بعرقي.. لكن انت فشلت في كل شيء فشلت كممثل وفشلت كأب وفشلت كأخ وفشلت كبنى ادم".
ويرد وائل عبد العزيز مرة أخيرة على أحمد العوضى وجاء رده كالتالى :
ردك متوقع جدا لأن هو ده أسلوبك ومش هيتغير بس انا هرد عليك.. بالنسبة أن حد بيصرف عليا عمرها ما اديتني جنيه في جيبي وأحب أفكرك اني قاعد في بيت إيجار وراكب عربية تويتا كنت جايبها قسط من شقايا وأظن انت شوفتها أيام مسلسل (لاخر) نفس لما كان معاك عربية لانسر.. ويادوبك حوشت عشان أغير عربيتي قريب.. وحتى لو حد من أهلي ساعدني في وقت ضيقة أنت مالك!!.. والا معندكش كلام تقوله !!!؟.. اما الشغل اللي أنا فاشل فيه فا لو بتعتبر 17 جايزة أخدتهم في أربع سنين فشل فا ياريت تعرف تبقي فاشل زيي لكنك مش هتعرف للاسف.. ومش أنت اللي تحدد فشلي ونجاحي في أي شيء لأنك طالع على رقبة الناس"
اما اختي فالمواقف والسنين اللي فاتت هيا اللي هتبين انا عملت عشانها ايه.. وكلمة اني طالع على حسها كل الناس عارفة اني شقيت طريقي لوحدي من 15 سنة وعلى الرغم من ده فا أنا عادي أبطل تمثيل من بكره قدام مصالح اختي.. اخيرا بقي .. ردك ده عليا اثبتلي انك ولا همك الإنسانة اللي انت ماشي تعاكسها في كل حتة وعلى صفحات السوشيال وسيبت المهم وابتديت في تشويهي ومفكرتش تاخد خطوة محترمه تجاهها الا أنك جريت على الترند وهتشتغل شغل قذر لان ده اللي يهمك (ترند ودور بطولة وفلوس وعربيات).. وبالنسبه للناس اللي بتقول اني بتكلم على موضوع زي ده على السوشيال ياريت تدخلوا تشوفوا صفحاتهم وتعرفوا أن الموضوع متعارف عليه للناس الا أهلها".
ياسمين سألتني بعد الطلاق انها ممكن تحب وتتجوز وانا أول واحد قولتلها طبعًا حبيبتي ومن حقك وهبقي أول حد يفرحلك.. بس مش أنت لأني أعرفك من سنين وعارف نواياك والأيام هتثبت صحه كلامي.. ونصيحة مني ليك لما تدخل على ست متخطارش وقت ضعفها وخروجها من طلاق ومشاكل لو فعلا بتفهم كنت بقيت صديق ينصح ويحافظ ويخاف لحد ما تبقى قوية تاني.. مش يتصور صور زي دي يا محترم.. وأخيرا في 5 أكونت باسمي على فيس بوك وانستجرام معرفش عنهم حاجة".
وقد أعترف الفنان أحمد العوضي، بحبه للفنانة ياسمين عبد العزيز، ونشر صورة تجمعه بها عبر حسابه الشخصي على موقع التواصل الاجتماعي «انستجرام» ليحسم بها الجدل حول علاقتهما أخيرا وعلق عليها قائلا: «بحبك يا ياسمين». يذكر أن «العوضي» شارك ياسمين في موسم رمضان الأخير من خلال مسلسل «لآخر نفس».