شقيق ياسمين عبد العزيز يُعاود فتح صفحته.. ويُهاجم أحمد العوضي

أعاد الفنان وائل عبد العزيز فتح صفحته على موقع التواصل الاجتماعي "فيسبوك" مجددا، بعد لحظات من غلقها، بعد الهجوم الذي تعرض له من نجوم الفن والجمهور، بعد تصريحاته ضد شقيقته الفنانة ياسمين عبد العزيز، بسبب علاقتها بالفنان أحمد العوضي.
وقام "وائل" بحذف "البوست" الذي نشره منذ ساعات والذي هاجم "العوضي" و"ياسمين" فيه، وكتب رسائل هجومية جديدة لأحمد العوضي قائلاً: "ردك متوقع جدا لأن هو ده أسلوبك ومش هيتغير بس انا هرد عليك.. بالنسبة أن حد بيصرف عليا عمرها ما اديتني جنيه في جيبي وأحب أفكرك اني قاعد في بيت إيجار وراكب عربية تويتا كنت جايبها قسط من شقايا وأظن انت شوفتها أيام مسلسل (لاخر) نفس لما كان معاك عربية لانسر.. ويادوبك حوشت عشان أغير عربيتي قريب.. وحتى لو حد من أهلي ساعدني في وقت ضيقة أنت مالك!!.. والا معندكش كلام تقوله !!!؟.. اما الشغل اللي أنا فاشل فيه فا لو بتعتبر 17 جايزة أخدتهم في أربع سنين فشل فا ياريت تعرف تبقي فاشل زيي لكنك مش هتعرف للاسف.. ومش أنت اللي تحدد فشلي ونجاحي في أي شيء لأنك طالع على رقبة الناس".
وتطرق "وائل" للحديث عن شقيقته "ياسمين" قائلا: "اما اختي فالمواقف والسنين اللي فاتت هيا اللي هتبين انا عملت عشانها ايه.. وكلمة اني طالع على حسها كل الناس عارفة اني شقيت طريقي لوحدي من 15 سنة وعلى الرغم من ده فا أنا عادي أبطل تمثيل من بكره قدام مصالح اختي.. اخيرا بقي .. ردك ده عليا اثبتلي انك ولا همك الإنسانة اللي انت ماشي تعاكسها في كل حتة وعلى صفحات السوشيال وسيبت المهم وابتديت في تشويهي ومفكرتش تاخد خطوة محترمه تجاهها الا أنك جريت على الترند وهتشتغل شغل قذر لان ده اللي يهمك (ترند ودور بطولة وفلوس وعربيات).. وبالنسبه للناس اللي بتقول اني بتكلم على موضوع زي ده على السوشيال ياريت تدخلوا تشوفوا صفحاتهم وتعرفوا أن الموضوع متعارف عليه للناس الا أهلها".
وتابع: "ياسمين سألتني بعد الطلاق انها ممكن تحب وتتجوز وانا أول واحد قولتلها طبعًا حبيبتي ومن حقك وهبقي أول حد يفرحلك.. بس مش أنت لأني أعرفك من سنين وعارف نواياك والأيام هتثبت صحه كلامي.. ونصيحة مني ليك لما تدخل على ست متخطارش وقت ضعفها وخروجها من طلاق ومشاكل لو فعلا بتفهم كنت بقيت صديق ينصح ويحافظ ويخاف لحد ما تبقى قوية تاني.. مش يتصور صور زي دي يا محترم.. وأخيرا في 5 أكونت باسمي على فيس بوك وانستجرام معرفش عنهم حاجة".
وكان الفنان وائل عبد العزيز، قد وجه رسائل صادمة لشقيقته النجمة ياسمين عبد العزيز، أرسلها عبر صفحته الشخصية بموقع التواصل الاجتماعي "فيسبوك".
وقال وائل في رسالته: "بصي يا ياسمين يا عبد العزيز يا اختي.. أنا معاكي وفي ضهرك من وانتي صغيره شيلت مشاكل كتيًر بسببك من وانتي عيلة صغيرة بداية من مشاكلك مع الشاعر وبرادة وانتي عارفه أن أنا اتاذيت فيها إزاي وقضية الشغالات مؤخرا غير قضي الضرب اللي كانت بينك وبين بنت هشام سليم الممثلة اللي لبستيها التورتة في وشها.. ووقفت جمبك بكل ما أملك من قوة أدافع عنك في كل موقف صعب مر عليكي ونسيت حياتي ونفسي عشانك وبقى كل همي أنا "ووالدتك " أنك تكبري وتبقي نجمة في مجالك".
وتابع: "سيبنالك اختياراتك كلها لنفسك ووفقنالك على معظم قراراتك وكنت الوحيد اللي ساندتك ووقفت جنبك في طلاقك.. لكن هنهرتل وتروحي تعرفي واحد أصغر منك ب10 سنين لا من سنك وتتصوري صور مالهاش أي لازمة على حساب سمعتك وسمعتنا لا ومحدش هيسمح.. من أمتى واحنا بنعمل أعياد ميلاد وتنزل على السوشيال ميديا.. من أمتى الناس بتجيب في سيرتنا!؟ ونقعد نتعاكس على السوشيال ميديا ومع ذلك حياتك وانتي حره فيها.. انا هتكلم على الشق اللي يخصني.. انتي مقاطعة كل العيلة عشان تعملي اللي على مزاجك.. أحنا دلواقتي وعايزين نفهم العلاقة دي أيه ورايحة على فين".
وذكر شقيق ياسمين عبد العزيز: "أما بالنسبة للأخ اللي ماشي وراكي في كل حتة وشايفك البيضة الدهب اللي هتفقسله كل يوم احب أقولك يا راجل لما تيجي تدخل بيت تدخله من بابه يا راجل !! وتقعد مع رجاله البيت !!.. دي الأصول وده الاحترام.. وطبعا لأنك عارف أنك مرفوض رافضا باتا فعمرك ما هتعمل ده ومعندكش غير طريق الشمال اللي أنت سالكه من سنين مع بنات الناس!!.. انا من رأيي كفاية عليك البطولة اللي أخدتها والعربية المرسيدس الهدية.. وتركز في شغلك وتسيبنا في حالنا لأن طول عمرنا في حالنا ومحدش سامع عننا حاجة وملوش لازمة جو الصور والمعاكسات ده وانا مبخفش من تهديد حد!!".
وزادت الفترة الماضية شائعات كثيرة حول ارتباط الثنائي الفنان أحمد العوضي والفنانة ياسمين عبد العزيز، بعد الصور التي انتشرت في عيد ميلادها، مما جعل الكثير من رواد مواقع التواصل الاجتماعي يتساءلون عن حقيقة وجود قصة حب سرية بينهما، بينما دفع البعض من جمهور ياسمين للكشف عن تمنياتهم ارتباطها به بشكل رسمي، ويتجاهل كل من ياسمين عبد العزيز وأحمد العوضي الرد على هذه الشائعات.
وتهرب "العوضي"، من الرد بطريقة ذكية على شائعة ارتباطه بالفنانة ياسمين عبد العزيز، وذلك خلال استضافته في برنامج "مساء dmc" في فبراير الماضي، وحرص على الحديث عن مواصفات فتاة أحلامه فقط وابتعد عن الرد على هذه الشائعات، سواء بالنفي أو بالتأكيد.
يذكر أن العوضي وياسمين عبد العزيز شاركا سويا في بطولة مسلسل "لآخر نفس" خلال شهر رمضان 2019، وشاركهما البطولة فتحي عبد الوهاب، أحمد صلاح حسني، تأليف عبد الله حسن، إخراج حسام علي.
الجديد بالذكر أن ياسمين عبد العزيز انفصلت عن زوجها رجل الأعمال محمد حلاوة منذ أكثر من عام ليتزوج بعد فترة قصيرة من الانفصال من ريهام حجاج.