أسما شريف منير عن زوجة والدها: بتشغلنا في البيت وبتعذب الولاد

وجهت أسما ابنة النجم شريف منير رسالة إلى "لورا" زوجة والدها من خلال صورة جديدة لها نشرتها على صفحتها الشخصية عبر موقع التواصل الاجتماعي لتداول الصور الأشهر إنستجرام.
وكتبت أسما شريف منير: "الست الجميلة اللي في الصورة دي هي (لورا) مرات ابويا! ايه ده هو في مرات أب حلوة كده اومال فين الحوافر و العيون الشريرة ، مش مرات اب؟ يبقي اكيد لازم تكون شريرة و بتعذب الولاد وبتشغلنا في البيت هههه".
وتابعت أسما: "ده اللي المجتمع و الافلام ديماً بيصدروا بس الحقيقة إن الست دي من اطيب وأجمل وأجدع الستات اللي في الدنيا، عمرنا ما اتخنقنا يمكن اختلفنا مرة بس عمرها ما اتعدت علي حقوقنا و لا التزمات ابويا لينا، ام اخواتي أو بناتي عشان هما صغنانين، هي عيلتي وحبيبتي، لما بزعل مع ابويا بتقف جنبي حتي لو هيتخانق معاها، انا وهي اصلاً شخصيتنا قريبة من بعض بتفهمني و بتحس بيا".
وأضافت: "انا عمري ما اتكلمت عنها عشان هي بعيدة عن الأضواء من زمان، بس حسيت اني لازم اقولها اني بحبها وبحترمها واديها حقها، وعشان اقول لأي ست لو انتي مرات أب لأولاد لازم تتقي ربنا فيهم وصاحبيهم وحبيهم كأنهم ولادك وربنا هيجازيكي كل خير، وجوزك هيشيلك فوق راسه.. بحبك يا لولو اوي وربنا يخلينا لبعض كلنا ديماً و شكراً علي كل حاجه حلوه عملتيهالي".