يا عم بص لتحت

من فضلك ..
لو سمحت .
يا عم بص لتحت !
يعنى أنت جاى تردم
وأنا اللى نازل فحت
قاللى مين حضرتك
صوتك مهوش غريب
بس الشكل !! اعذرنى لو سرحت
قلت أنا اللى حفرت القناة
وأنا اللى بنيت الهرم
أنا اللى اخترعت الكتابة
وعلمت باقى الأمم
وكتمت شكوايا والحلم جوايا
لا كرهت يوم بلدى مع أنها سلمت
شايفانى بشرب نارها
و بعبى مرارها
لا قالت لي كلمة حلوة
ولا حتى جت سلمت
قاللى وأيه اللى جابك تحت !!؟؟
مش عارف تطلع ولا خلاص
تقلت .. ريحت
قلت الله يجازيهم دبحونى ألف مرة
بس تصدق أنا عمرى ما اندبحت
عدت على رقبتى السيوف ولا عمرها علمت
ويدوب يعدى الورد تلاقينى انجرحت