لماذا صوتت ضد شفيق؟؟؟

مبدئياً صدق أو لا تصدق أنا شخص ضد الإسلام السياسي، ضده عشان اسباب دينيه قبل ما تكون ثوريه، لأن شئنا أم أبينا أخطاء تيار الإسلام السياسي بتشوه الإسلام نفسه و اللي شفناه في سنه و نص منهم بيدل إنهم لا مستعدين فكرياً و لا أخلاقياً و لا دينياً إنهم يبقوا واجهه الدين
أنا صوتت ضد شفيق و محبش حد يقول أني صوتت لمرسي لأنه غير مؤهل لحكم قريه من وجهه نظري ... إمال صوتت ضد شفيق ليه؟؟؟؟؟؟؟
بمنتهي البرجماتيه (التفكير في المصلحه)
-مش من مصلحه التيار الثوري نهائياً إن سواء (المجلس العسكري إو الإخوان) حد فيهم يهيمن علي كل حاجه أو يخلص منهم علي التاني، لأن ساعتها هيبقي الدور علي الثوار.
- الكلام الوجيه عن تكويش الإخوان علي السلطات إنتهي بحل البرلمان، و مستحيل البرلمان اللي جاي ياخد فيه التيار الإسلامي حتي نص المقاعد اللي خدوها! المشكله إن الآيه دلوقتي إتقلبت و بقت إن لو شفيق كسب هيبقي المجلس العسكري هو اللي هيكوش علي كل حاجه.
-الثوره الرومانيه: لما نائب الرئيس ليسكو (شفيق بتاعهم) إختاره الشعب في إنتخابات بعد الثوره، ليسكوا قتل 10000 ثائر و تحول لديكتاتور أكتر من الرئيس المخلوع تشاوتشيسكو
- شفيق مستعين برجال الحزب الوطني، و تمن دعمهم ليه لازم هيكون حصانه و إمتيازات، عشان يديهم الحصانه لازم يفضل مسيطر علي القضاء و النائب العام و عشان يديهم إمتيازات من أراضي و تعيين معارف و فرص شغل مع الحكومه لازم يسيب فاسدين في اجهزه الدوله عشان يعرف يمرر الكلام ده... يعني بإختصار شفيق حتي و لو نيته حسنه مضطر يعيد دوله مبارك الفاسده. و أخيرا إستمرار الجيش في وضعه الإقتصادي معناه ضعف فرص الإستثمار و إسأل فيها أي إقتصادي. يعني شفيق جاي و معاه أسباب فشله.
- شفيق وعد بإسقاط ديون الفلاحين، و ديون أصحاب التاكسي الإبيض و أخيراً وعد اللي تعدوا بالبناء علي الإرض الزراعيه إنه هيسامحهم!!!! غير أنه كده حول ميزانيه الدوله للصرف علي حملته الإنتخابيه، فالمصيبه الحقيقيه إن ده معناه ترسيخ لإنعدام المسؤولية و هيخلي المصريين يستلفوا و يقولوا إن شاء الله في موسم الإنتخابات ديونا تتلغي!
الوعود دي مسمار آخر في نعش الإصلاح الإقتصادي
- لو مرسي مكسبش و مسك شفيق و فشل (و ده أمره مفروغ منه إنه يفشل) بعد نهايه فترته هيشغل الإخوان إسطوانه إنتوا مجربتوناش و الإعلام ظلمنا و هنتلاقي نفسنا بدل ما بنأجل الثوره 4 سنين بتوع شفيق هنستني ال4 سنين اللي بعده بتوع الإخوان و اللي برضه لأسباب كتيره مش هينجحوا من وجهه نظري ... فإنهارده لو مرسي كسب ممكن بعد فتره الرئاسه اللي جايه نخلص من العسكر و الإخوان في ضربه واحده
- لو مرسي كسب غالباً أجهزه الدوله مش هتقدر تستحمله و هيخترعوله مخرج قانوني و دستوري من إختراعهم و غالباً مدته حكمه لن تستمر سنه أو سنتين بالكتير (مثال: رئيس مجلس الدوله صرح بالفعل إن حكم حل مجلس الشعب يعني إعاده إنتخابات الرئاسه) ... أما شفيق فهيستخدموا كل التلاكيك القانونيه عشان يخلوه يقعد الأربع سنين
- أنا بدين قيادات الإخوان و شايف إنهم السبب في الموقف السيئ اللي إحنا فيه، و بتمني من كل أخواني نيته حسنه (و هما النسبه الغالبيه في الإخوان) إنه يراجع كل اللي حصل من أخطاء إخوانيه فادحه هتأخر الثوره سنين، و يفكر إنه هيتكتب في التاريخ إنه كان جزء من أخطاء الإخوان بتبريره قرارات هو مش فاهمها أو بيردد مبررات حفظوهاله .... و شهاده حق بشهدها مِن تعامل مع قيادات إخوانيه و أصدقاء إخوان في أماكن إتخاذ القرار .... و الله العظيم بيضحكوا عليكوا لما بيقولولكوا هما فاهمين اللي بيحصل وقارينه، قيادات الإخوان تايهه و القرارات متخبطه و إنت يا غلبان مينفعش تعرف الكلام ده عشان لو شكيت في تقديرهم للأمور هتناقش و تعترض و يبقالك رأي حقيقي و ساعتها مش هيبقي فيه سمع و طاعه
- هييجي يوم لما تعرف الحقائق هتفهم إن استمرار في الإخوان جريمة اخلاقية، و إن أفضل خدمة يقدمها الإخوان للثورة إنهم يبتعدوا عن السياسة و يخلوهم في الدعوة.
- أخيراً محترم قرار كل إنسان و الموضوع مش أبيض و إسود الموضوع رمادي لأقصي درجه ممكنه