بلال فضل : المشير يتحمل جريمة التحرير والمجلس العسكرى بيولع البلد وملعون أبو اللى يسكت على كده

فتح الكاتب الصحفي بلال فضل النار على المشير طنطاوى بصفته رئيس المجلس العسكرى الحاكم لشئون البلاد بعد الأحداث التي جرت بميدان التحرير واصفا تلك الأحداث ب "الجريمة الواضحة" و"المؤامرة المكشوفة" التي يتحمل مسئوليتها المشير حسين طنطاوي رئيس المجلس الأعلى للقوات المسلحة بمفرده، مؤكداً أن المجلس العسكري هو فقط من يريد إشعال مصر.

وجاء نص ما كتبه فضل على حسابة الخاص على موقع التواصل الاجتماعي "تويتر" كالتالى : "القضية واضحة وضوح الشمس، اللي حصل جريمة يتحمل مسئوليتها شخص واحد هو المشير طنطاوي واللي يقول غير كده بيكدب على نفسه، اللي بيحصل مؤامرة مكشوفة لو كان المجلس خايف على استقرار البلد ماكانش فض الاعتصام بالعنف ده لو سابوه كان كمل في هدوء، هذه جريمة بكل المقاييس، لما كانت القوى الثورية بتخطئ في قرار غير محسوب ناس كتير كانت بتنتقد عشان البلد ماتولعش، النهاردة اللي بيولع في البلد هو المجلس العسكري فقط".

وأضاف: "المجلس مش غبي هو عارف إن القضية مش قضية إخلاء شوارع وميادين القضية قضية إشعال صراع يبرر بقاءه في السلطة العار لكم ولوزرائكم ولمن يساندكم".

وتابع فضل: "ماحدش يتكلم عن ردود الفعل بتاعة حرق عربية الأمن من غير مايبذل مجهود إنه يفهم اللي حصل من الأول ويشوف إزاي الاعتصام اتفض خلوا عندكو ضمير، كل اللي حصل ممكن تبرروه بالكذب والتدليس لكن إننا نشوف ناس لابسين مدني ملتفين حوالين شاب أعزل بيضربوا فدي جريمة لازم تتحاسبوا كلكم عليها، لا في حد راح وزارة الدفاع ولا سفارة دول ناس مصابين سلميين اتسحلوا بكل وحشية عشان تتنفذ مؤامرة لتكرار سيناريو 54، وملعون أبو اللي يسكت على ده".